कृषी सहाय्यकांचे गडचिरोलीत विविध मागण्यांसाठी धरणे आंदोलन

आज सहसंचालक कार्यालयापुढे ठिय्या

गडचिरोली : महाराष्ट्र राज्य कृषी सहाय्यक संघटना जिल्हा शाखा गडचिरोली यांच्या वतीने कृषी सहाय्यकांच्या विविध मागण्यांसाठी दि.19 मे रोजी जिल्हा अधीक्षक कृषी अधिकारी कार्यालयासमोर एक दिवसीय धरणे आंदोलन करण्यात आले. या आंदोलनाचा दुसरा टप्पा म्हणून आज (दि.21) नागपूर येथे कृषी सहसंचालकांच्या कार्यालयापुढे धरणे आंदोलन करून लक्ष वेधले जाणार आहे.

अशा आहेत कृषी सहायकांच्या मागण्या

1.कृषी सेवकांचा सेवाकालावधी रद्द करून त्यांना नियमित कृषी सहाय्यक पदावर नियुक्ती देण्यात यावी.
2. कृषी सहाय्यकाचे पदनाम बदलून सहाय्यक कृषी अधिकारी करण्यात यावे.
3. कृषी विभागाचे कामकाज कालानुरूप ऑनलाइन व डिजिटल होत असताना सुद्धा कृषी सहायकांनी वारंवार मागणी करूनही शासनामार्फत लॅपटॉप दिले जात नाही, ते त्वरित उपलब्ध करून द्यावेत.
4. कृषी सहाय्यकांना ग्रामस्तरावर काम करण्यासाठी मानधन तत्वावर कायमस्वरूपी कृषी मदतनीस उपलब्ध करून द्यावे.
5. ग्रामस्तरावर निविष्ठा वाटपासंदर्भात वारंवार निवेदन देऊन सुद्धा त्यात सुसूत्रता येत नाही. कृषी सहायकांना वाहतूक भाड्यापोटी आर्थिक भार सहन करावा लागतो. मार्गदर्शक सूचनेमध्ये विविध योजनेत कृषी सहाय्यक यांना वाहतूक भत्त्याची तरतूद करण्यात यावी.
6. कृषी विभागाच्या आकृतीबंधास तात्काळ मंजुरी देण्यात यावी व कृषी पर्यवेक्षकांची पदे वाढवून कृषी सहाय्यकांच्या पदोन्नतीमधील कुंठीत अवस्था दूर करावी. तसेच महसूल विभागाप्रमाणे कृषी विभागाचा आकृतीबंध तयार करावा.
7. पोखरासारख्या महत्त्वाकांक्षी योजनेत मदतनीस म्हणून समूह सहाय्यक यांची नेमणूक करण्यात यावी.
8. नैसर्गिक आपत्तीवेळी पंचनामे करणे व त्यानंतर करावयाच्या कामकाजाबाबत महसूल, ग्रामविकास व कृषी विभागाच्या जबाबदाऱ्यांबाबत योग्य व न्यायसंगत कार्यपद्धती तयार करण्यात यावी. यामध्ये वारंवार कृषी विभागावर होत असलेला अन्याय दूर व्हावा.
9. कृषी सहाय्यक संवर्गाच्या आस्थापनेविषयी सर्व अडीअडचणी तात्काळ सोडवण्यात याव्यात.
10. महात्मा गांधी राष्ट्रीय ग्रामीण रोजगार हमी योजनेअंतर्गत क्षेत्रीय स्तरावरील अडचणी लक्षात घेऊन लक्ष्यांक देण्यात यावे.

यासारख्या मागण्यांसाठी कृषी सहाय्यकांनी आंदोलन उभारले आहे. मागण्या पूर्ण न झाल्यास आंदोलन तीव्र करण्यात येईल, अशी माहिती संघटनेचे जिल्हा अध्यक्ष अमोल पुनघाटे, सचिव किशोर रायसिडाम, यांच्यासह संतोष धाडसे, प्रेमचंद शेडमाके, विनोद वझाडे, संघटक, अविनाश किरंगे, सहकोषाध्यक्ष व जिल्ह्यातील कृषी सहाय्यकांनी दिली.