गडचिरोली : मुसळधार पाऊस, पाण्याची वाढती पातळी, आणि कोयना धरणातून पाणी सोडल्यामुळे सातारा जिल्ह्यातील अनेक गावांना पुराचा मोठा फटका बसला आहे. यातून कुटुंबे विस्थापित झाल्याने त्यांना जीवनावश्यक वस्तूंच्या तुटवड्याचा सामना करावा लागत आहे. या संकटाच्या काळात लोकांच्या पाठीशी उभे राहून, लॉयड्स मेटल्स अँड एनर्जी लिमिटेडची सीएसआर शाखा असलेल्या लॉयड्स इन्फिनिट फाउंडेशन (एलआयएफ)ने विविध जीवनावश्यक साहित्य असलेल्या 3 हजार किट्स साताऱ्यात पोहोचवून वाटप केल्या जात आहे.
25 ऑगस्टपासून, एलआयएफ टीमने सातारा जिल्ह्यातील पाटण तालुक्यातील बाधित कुटुंबांना मदत करण्यासाठी मदत किट तयार केल्या आहेत. या प्रत्येक किटमध्ये ब्लँकेट, तांदूळ, तेल, डाळ, कणिक, मसाले, साबण, टूथपेस्ट आणि पिण्याच्या पाण्याच्या कॅन यासारख्या दैनंदिन वापराच्या वस्तू समाविष्ट आहेत. पुरामुळे बाधित कुटुंबांना आधार देणे हा या जीवनावश्यक वस्तू उपलब्ध करून देण्यामागचा उद्देश आहे.
1 सप्टेंबरपर्यंत 12 ट्रकमध्ये भरलेले एकूण 2,546 क्रेट नागपूरहून साताऱ्यातील पाटण तालुक्यात पाठवण्यात आले आहेत. कोनसरी येथील लॉयड्स मेटल्सची सीएसआर टीम सातारा जिल्ह्यातील स्थानिक प्रशासन आणि अधिकाऱ्यांसोबत बाधित लोकांना मदत साहित्याचे वितरण करत आहे.
या उपक्रमाबद्दल बोलताना, एलआयएफच्या प्रतिनिधीने सांगितले की, लोकांच्या सर्वात कठीण काळात त्यांच्या पाठीशी उभे राहणे हेच आमचे प्राधान्य आहे. सातारा जिल्ह्यातील कुटुंबांना मदत करण्यासाठी हे एक छोटेसे पाऊल आहे आणि आमची टीम गरजूंना मदत करण्यास तत्पर राहील. कठीण परिस्थितीत लॉयड्स इन्फिनिट फाउंडेशनने नेहमीच लोकांच्या कल्याणावर लक्ष केंद्रित केले आहे. संवेदनशीलता आणि जबाबदारीने समुदायांना मदत करण्यास एलआयएफ वचनबद्ध असल्याचे सदर प्रतिनिधीने सांगितले.
