गडचिरोली : ओबीसी समाजाच्या आरक्षणात मराठा समाजाला वाटा देऊ नये, यासाठी नागपूर येथील संविधान चौकात ३० ऑगस्टपासून साखळी उपोषणास सुरुवात झाली आहे. रविवारी उपोषणाच्या दुसऱ्या दिवशी या साखळी उपोषणस्थळी गडचिरोली जिल्ह्यातील भाजप व ओबीसी मोर्चाच्या पदाधिकाऱ्यांनी माजी खासदार तथा भाजपा अनुसूचित जनजाती मोर्चाचे राष्ट्रीय महामंत्री डॉ.अशोक नेते यांच्या नेतृत्वाखाली भेट देऊन आपला पाठिंबा दर्शवला.
याप्रसंगी डॉ.नेते यांनी राष्ट्रीय ओबीसी महासंघाचे अध्यक्ष डॉ.बबनराव तायवाडे यांच्याशी चर्चा करत ओबीसी समाजाच्या न्याय हक्कांसाठी आपला सक्रिय पाठींबा जाहीर केला. ‘ओबीसी समाजाचे आरक्षण ही पिढ्यान् पिढ्यांची लढाई व संघर्षाचे फलित आहे. या आरक्षणात कुणालाही हस्तक्षेप करण्याचा अधिकार नाही. कुणालाही ओबीसीच्या आरक्षणातून वाटा देता कामा नये. आम्ही गडचिरोलीमध्येही आरक्षणाच्या प्रश्नावर आंदोलन केले. ओबीसीच्या न्याय हक्कांसाठी आम्ही एकदिलाने उभे राहणार आहोत. हा लढा एकसंघ राहूनच यशस्वी होणार आहे, आम्ही ओबीसी समाजाच्या हितासाठी पाठीशी आहोत, असे यावेळी मा.खा.नेते म्हणाले.
यावेळी भाजपचे माजी जिल्हाध्यक्ष प्रशांत वाघरे, कि.मो.प्र.सचिव रमेश भुरसे, जिल्हा महामंत्री प्रकाश गेडाम, ओबीसी मोर्चाचे जिल्हाध्यक्ष भास्कर बुरे, माजी जिल्हाध्यक्ष (ओबीसी मोर्चा) अनिल पोहनकर, ओबीसी महासंघाचे उपाध्यक्ष प्रा.शेषराव येलेकर, आरपीआय (आठवले गट) जिल्हाध्यक्ष मेघश्याम घुटके, प्रा.चिकटे, रत्नदीप म्हशाखेत्री, गणेश दहेलकर, सचिन भुसारी यांच्यासह अनेक पदाधिकारी व कार्यकर्त्यांची उपस्थिती होती.
