गडचिरोली : जिल्हाधिकारी अविश्यांत पंडा यांनी मुलचेरा तालुक्याचा दौरा करून शेतकऱ्यांच्या बांधावर भेट देत त्यांच्या समस्या जाणून घेतल्या. यावेळी त्यांनी शेतकऱ्यांशी संवाद साधत पिकांची स्थिती आणि नुकसानाची सविस्तर माहिती घेतली आणि मदत व पुनर्वसन उपाययोजनांबाबत चर्चा केली.
या दौऱ्यात उपविभागीय अधिकारी तथा सहाय्यक जिल्हाधिकारी अरुण एम. आणि तहसीलदार चेतन पाटील उपस्थित होते. जिल्हाधिकाऱ्यांनी विविध गावांतील शेतकऱ्यांना भेटून शेतातील परिस्थिती प्रत्यक्ष पाहिली आणि कृषी विभागाच्या अधिकाऱ्यांना तत्काळ पंचनामे पूर्ण करून शासनास प्रस्ताव सादर करण्याच्या सूचना दिल्या.
सेवा पंधरवड्याअंतर्गत ‘सर्वांसाठी घरे’ या अभियानात जिल्हाधिकाऱ्यांनी सन 2011 पूर्वीच्या शासकीय जमिनीवरील घरांना नियमित करण्याच्या प्रक्रियेत मुलचेरा तालुक्यातील निवडक 10 लाभार्थ्यांना अतिक्रमण नियमनाखाली पट्टे वाटप केले. तालुक्यात 67 लाभार्थ्यांना निवासी पट्टे मंजूर करण्यात आले असल्याची माहिती तहसीलदार पाटील यांनी यावेळी दिली.
या दौऱ्यात जिल्हाधिकाऱ्यांनी तालुक्यातील विविध विकासकामांची सखोल पाहणी केली. त्यांनी मंडळ अधिकारी, तलाठी आणि कर्मचाऱ्यांसोबत बैठक घेऊन महसूल व सेवा पंधरवडा उपक्रमांची प्रगती तपासली. याशिवाय शासकीय आश्रमशाळा, ग्रामीण रुग्णालय, जिल्हा परिषद शाळा विवेकानंदपूर तसेच एकलव्य मॉडेल स्कूल येथे भेट देवून पाहणी करून आवश्यक सूचना दिल्या.
