गडचिरोली : कुरखेडा तालुक्यातील गुरनोली येथील मामा तलावात यावर्षी गाळयुक्त शिवार गाळमुक्त धरण या योजनेअंतर्गत नाम फाउंडेशनद्वारे उत्कृष्ट कार्य करण्यात आले. यामुळे तलावाचा पाणीसाठा मोठ्या प्रमाणात वाढला आहे. त्याचप्रमाणे या परिसरातील शेतकऱ्यांनी नेलेल्या गाळामुळे शेतीचे उत्पादनसुद्धा वाढले आहे. त्यामुळे जिल्हा खनिज निधीतून याप्रमाणे सर्व मामा तलावांचे खोलीकरण प्रशासनाने करावे, अशी मागणी भाजपचे जिल्हा उपाध्यक्ष आणि मानवाधिकार संघटनेचे प्रदेश अध्यक्ष डॅा.प्रणय खुणे यांनी केली. (अधिक बातमी खाली वाचा)
डॅा.खुणे यांनी या तलावाला भेट देऊन पाणीसाठा वाढल्याबद्दल समाधान व्यक्त केले. गडचिरोली जिल्ह्यातील समस्त मामा तलावांचे जलसंधारण विभागाच्या वतीने खोलीकरण करण्यात यावे, अशी मागणी त्यांनी केंद्र व राज्य सरकारकडे केली. प्रामुख्याने गडचिरोली जिल्ह्यातील जिल्हा नियोजन विभागातून खनिज विकास निधीअंतर्गत जिल्ह्यातील मामा तलावांचे खोलीकरण केल्यास शेतकऱ्यांना मोठा लाभ होईल, अशी भावना त्यांनी व्यक्त केली.
यावेळी राष्ट्रीय मानवाधिकार संघटनेचे सल्लागार देवानंद खुणे, भामरागड तालुका अध्यक्ष भीमराव वनकर गुरुजी, नितेश खुणे व पदाधिकारी तथा कार्यकर्ते उपस्थित होते.
