अहेरी : मागील अनेक वर्षापासून प्रलंबित असलेले आलापल्लीवासियांच्या प्रॉपर्टी कार्डचा (मालकी हक्क) प्रश्न मार्गी लागणार आहे. गुरुवार 25 सप्टेंबर रोजी भूमी अभिलेख नागपूरचे उपसंचालक लालसिंग मिसाळ यांनी अहेरीत येऊन अपीलार्थींची सुनावणी घेतली. त्यामुळे प्रॅापर्टी कार्ड मिळण्याचा मार्ग मोकळा होणार आहे. आमदार डॉ.धर्मरावबाबा आत्राम यांच्या प्रयत्नांमुळे आणि पाठपुराव्यामुळे या हालचाली वाढल्याने समाधान व्यक्त होत आहे.
या सुनावणीला जवळपास 76 आपिलार्थी हजर होते. सुनावणीदरम्यान लवकरच आलापल्लीवासियांच्या प्रॉपर्टी कार्डसंबंधीचे वाद निकाली काढण्याचे व प्रॉपर्टी कार्ड प्रदान करण्याचे आश्वासन भूमी अभिलेख उपसंचालक मिसाळ यांनी दिले.
यावेळी अहेरीचे भूमीअभिलेख उपअधीक्षक गुणवंत रणदिवे, आलापल्लीचे वनपरिक्षेत्रधिकारी गौरव गणवीर, वनपाल पूनमचंद बुद्धावार, तलाठी एकनाथ टपाले, वनरक्षक हरीश दहागावकर आदी अधिकारी-कर्मचारी हजर होते.
तनुश्री आत्राम व हर्षवर्धनबाबा यांचीही उपस्थिती
आलापल्लीवासियांना अनेक वर्षापासूनचे प्रॉपर्टी कार्ड प्राप्त व्हावे यासाठी आमदार डॉ.धर्मरावबाबा आत्राम यांच्या मार्गदर्शनात राष्ट्रवादी काँग्रेस पक्षाचे (अजित पवार गट) अहेरी विधानसभा अध्यक्ष लक्ष्मण येरावार हे हिरीरीने धडपड करत आहेत. अहेरी येथील सुनावणीदरम्यान सिनेट सदस्य तथा राष्ट्रवादी युवती काँग्रेसच्या जिल्हाध्यक्ष तनुश्री आत्राम, अहेरी पंचायत समितीचे माजी सदस्य हर्षवर्धनबाबा आत्राम, कैलास कोरेत यांच्यासह अपिलार्थी आवर्जून उपस्थित होते.
