झिंगानूर : झिंगानूर उपपोलीस स्टेशनच्या हद्दीतील लिंगापूर टोला या गावाजवळील नाला पावसामुळे प्रवाहित होऊन वाहतुकीचा मार्ग बंद झाला होता. यामुळे उपपोस्टे झिंगानूर आणि एसआरपीएफच्या जवानांनी नागरिकांच्या सुविधेसाठी श्रमदानातून पुलाची उभारणी करत गावात येण्याजाण्याची सोय केली.
पावसाळ्यामध्ये लिंगापूर टोला या छोट्या वस्तीच्या गावाजवळील नाला प्रवाहित होऊन गावाशी संपर्क तुटत असतो. त्यादरम्यान वैद्यकीय मदत आणि शालेय विद्यार्थ्यांचे शैक्षणिक नुकसान होत होते. या समस्येवर उपाय म्हणून पोलीस अधीक्षक नीलोत्पल यांच्या मार्गदर्शनाखाली झिंगानूरचे पोलिस अधिकारी व अंमलदार, तसेच एसआरपीएफच्या अंमलदारांनी श्रमदानातून एक नवीन पूल तयार केला. त्यामुळे येथील नागरिकांचे पुलावरून येणे-जाणे सुखकर झाले.
गडचिरोली पोलिसांच्या या समाजाभिमुख कार्यामुळे नागरिकांच्या मनात गडचिरोली पोलीस दलाबाबत आपुलकीची भावना निर्माण झाली आहे. पोलीस केवळ सुरक्षेसाठीच नव्हे, तर समाजाच्या विकासासाठीही कटिबद्ध आहेत, हे या उपक्रमाद्वारे अधोरेखित झाले आहे.
सदर उपक्रम पोलीस अधीक्षक नीलोत्पल, अपर पोलीस अधीक्षक (अभियान) एम.रमेश, अपर पोलीस अधीक्षक (प्राणहिता) सत्यसाई कार्तिक, अपर पोलीस अधीक्षक (प्रशासन) गोकुल राज, तसेच उपविभागीय पोलीस अधिकारी (सिरोंचा) संदेश नाईक यांच्या मार्गदर्शनाखाली उपपोस्टे झिंगानूरचे प्रभारी अधिकारी पोउपनि.अभिजीत घोरपडे, पोउपनि.ओंकार हेगडे, पोउपनि.अनिकेत खोपडे व अंमलदार, तसेच एसआरपीएफच्या अंमलदारांनी राबविला आहे.
