गडचिरोली : आयुष्यमान भारत, प्रधानमंत्री जनआरोग्य योजना आणि महात्मा जोतिराव फुले जनआरोग्य योजनेचा लाभ अधिकाधिक नागरिकांपर्यंत पोहोचवण्यासाठी आरोग्य विभागाने पुढाकार घ्यावा, असे आवाहन आयुष्मान भारत मिशन महाराष्ट्र समितीचे अध्यक्ष डॉ.ओमप्रकाश शेटे यांनी केले. याशिवाय गडचिरोली जिल्ह्यात असलेली तज्ज्ञ डॅाक्टरांची कमतरता दूर करण्यासाठी त्यांना योग्य तो वाढीव मोबदला देण्याचा प्रस्ताव राज्य शासनाकडे सादर करणार असल्याचे डॅा.शेटे म्हणाले. जिल्हाधिकारी कार्यालयात आयोजित आढावा बैठकीत आणि नंतर पत्रकारांशी ते बोलत होते.
यावेळी आयुष्यमान भारत मिशन महाराष्ट्र समितीचे गठन झाल्यानंतर आपला गडचिरोलीत पहिलाच दौरा असल्याचे डॅा.शेटे यांनी सांगितले. प्रधानमंत्री जनआरोग्य योजनेचा गडचिरोली जिल्ह्यात जितक्या रुग्णांना लाभ मिळाला तो आकडा समाधानकारक नसल्याचे ते म्हणाले. याचा अर्थ रुग्ण वाढावे असे नाही, तर जास्तीत जास्त रुग्णांना या योजनेचा लाभ द्यावा, अशी सूचना त्यांनी आरोग्य विभागाच्या अधिकाऱ्यांना केली.
कोणताही रुग्ण उपचारापासून वंचित राहता कामा नये, यासाठी कायदा व नियमापेक्षा माणसाचा जीव महत्त्वाचा समजून तातडीने उपचार व्हावेत. मोफत उपचार हा नागरिकांचा मूलभूत हक्क आहे. त्यामुळे लाभ देताना केवळ रुग्णाचे आयुष्मान कार्ड किंवा रेशन कार्ड तपासावे, नातेवाईकांचे कार्ड मागून लाभ नाकारणे टाळावे, असे डॅा.शेटे म्हणाले. राज्यात सध्या मोफत उपचाराचे प्रमाण 30 टक्के आहे. हे प्रमाण किमान 85 टक्क्यांपर्यंत वाढवण्याचा सरकारचा मानस असून, यासाठी आरोग्य यंत्रणेला नव्या दमाने कार्याला लागावे लागेल, असे ते म्हणाले.
अपघातग्रस्त रुग्णांसाठी ‘स्व.बाळासाहेब ठाकरे अपघात विमा योजना’ उपयुक्त ठरू शकते. यासाठी टोल फ्री क्रमांक 18002332200 वापरण्याचे निर्देश त्यांनी दिले.
या बैठकीला आमदार डॉ.मिलींद नरोटे, जिल्हा परिषदेचे मुख्य कार्यकारी अधिकारी सुहास गाडे, निवासी उपजिल्हाधिकारी सुनील सुर्यवंशी, जिल्हा पुरवठा अधिकारी प्रकाश पाटील, जिल्हा शल्य चिकित्सक डॉ.माधुरी किलनाके, जिल्हा आरोग्य अधिकारी डॉ.प्रताप शिंदे यांच्यासह शासकीय व खाजगी रुग्णालयांचे प्रतिनिधी उपस्थित होते.
48 टक्के नागरिकांकडे आयुष्यमान कार्ड
जिल्ह्यात आतापर्यंत 4 लाख 44 हजार 290 आयुष्मान कार्ड तयार करण्यात आले असून, हे प्रमाण 48 टक्के असल्याचे डॉ.शिंदे यांनी सांगितले. हे प्रमाण वाढवून 100 टक्क्यांपर्यंत नेण्याचे उद्दिष्ट त्यांनी दिले. बैठकीत गडचिरोली जिल्ह्यात आयुष्यमान भारत योजनेची सद्यस्थिती सादरीकरणाद्वारे मांडण्यात आली. जुलै 2024 पासून आतापर्यंत 883 लाभार्थ्यांकडून 902 प्रस्ताव प्राप्त झाले आहेत. त्यापैकी 800 प्रस्तावांना मंजुरी देण्यात आली आहे. त्यासाठी एकूण 1 कोटी 77 लाख 36 हजार 700 रुपयांची रक्कम मंजूर करण्यात आली आहे.
या बैठकीत खाजगी रुग्णालयांच्या प्रतिनिधींनीही अंमलबजावणीत येणाऱ्या अडचणी, त्रुटी आणि शंका मांडल्या, त्यावर उपाययोजना करण्यात येतील, अशी ग्वाही त्यांनी दिली.
