आलापल्ली : दक्षिण गडचिरोलीतील वनविभागाचे मुख्यालय असलेल्या आलापल्लीच्या नागेपल्ली येथील महाराष्ट्र वनविकास महामंडळाच्या (एफडीसीएम) वसाहतीत चक्क चितळाचे मांस शिजत असल्याचा प्रकार उघडकीस आल्याने खळबळ उडाली होती. या प्रकरणात चितळाची शिकार, विक्री आणि खरेदी करणारे मिळून 5 जणांना अटक करण्यात आली. त्यात मांस शिजवणाऱ्या महिलेचाही समावेश आहे. यात वन अधिकारी किंवा कर्मचाऱ्यांचा सहभाग नसल्याचे आलापल्ली वनविभागाने स्पष्ट केले. मात्र आरोपींत काही हंगामी वनमजूर आहेत. (अधिक बातमी खाली वाचा)
वनविभागाने या प्रकरणात आरोपी म्हणून रेखा दिवाकर वनकर रा.एफडीसीएम कॅालनी, नागेपल्ली यांच्यासह संजय गोविंदा कोटरंगे (रा.नागेपल्ली), तसेच अनिल राजन्ना बोलेम (40 वर्ष), भानय्या बुचय्या जंगीडवार (62 वर्ष) आणि अमोल गणपत ठाकरे (35 वर्ष) अशा पाच आरोपींना अटक केली. त्यांनी चितळाची शिकार केल्याची कबुली दिली. अधिक चौकशीसाठी न्यायालयाने त्यांना वनकोठडी दिली आहे.
ही कारवाई मुख्य वनसंरक्षक रमेश कुमार, आलापल्लीच्या उपवनसंरक्षक दीपाली तलमले यांच्या मार्गदर्शनात उपविभागीय वनअधिकारी शिशुपाल पवार, वनक्षेत्रपाल नारायण इंगळे, गौरव गणवीर, वनपाल सहारे, गोवर्धन, बुद्धावार, तुराणकर तसेच वनरक्षक राव आणि दहागावकर यांच्या पथकाने केली.
