गडचिरोली : 28 जुलै ते 3 ऑगस्टदरम्यान माओवाद्यांकडून राबविल्या जाणाऱ्या नक्षल सप्ताहाची आता दुर्गम भागातही भीती राहिली नसल्याचा प्रत्यय दामरंचा भागातील नागरिकांनी दिला. जिमलगट्टा उपविभागांतर्गत येणाऱ्या अतिदुर्गम दामरंचा उपपोलीस स्टेशनच्या हद्दीतील नागरिकांनी पोलीस दलावर विश्वास दाखवत 3 नग भरमार बंदुका आणि एक नग बंदुकीचे बॅरेल पोलिसांच्या स्वाधीन केले आहे.
मोठ्या प्रमाणावर असलेल्या जंगलाच्या क्षेत्रामुळे दुर्गम-अतिदुर्गम भागातील सामान्य नागरिक आपल्या पारंपरिक शेती व्यवसायासोबतच शिकार करुन उदरनिर्वाह करीत होते. शिकार करण्यासाठी तसेच वन्य प्राण्यांपासून संरक्षणासाठी अनेक सामान्य नागरिक बंदूका बाळगत असत. अशा प्रकारच्या वडीलोपार्जित बंदुका व शस्त्रे गडचिरोली जिल्ह्रात अनेक नागरिकांकडे होत्या. दुर्गम-अतिदुर्गम भागात माओवादी याच बाबींचा फायदा घेऊन, सर्वसामान्य जनतेला माओवादी चळवळीत समाविष्ट करण्याचा प्रयत्न करत असतात. याकरीता पोलीस अधीक्षक नीलोत्पल यांच्या संकल्पनेतून अपर पोलीस अधीक्षक (अभियान) एम.रमेश, अपर पोलीस अधीक्षक अहेरी (प्राणहिता) सत्यसाई कार्तिक, अपर पोलीस अधीक्षक (प्रशासन) गोकुल राज, तसेच सर्व उपविभागीय पोलीस अधिकारी यांच्या मार्गदर्शनाखाली नागरिकांनी स्वत:जवळ बाळगलेल्या बंदूका स्वेच्छेने गडचिरोली पोलीस दलाच्या स्वाधिन करण्याचे आवाहन करण्यात आले होते.
पोलीस दलाच्या आवाहनाला सकारात्मक प्रतिसाद देत माओवाद्यांच्या सप्ताहाला न जुमानता दामरंचा हद्दीतील नागरिकांनी 3 नग बंदुका व 1 बंदुकीचे बॅरेल पोलिसांच्या स्वाधीन केले. उपपोस्टे दामरंचा येथील प्रभारी अधिकारी पोउपनि. पृथ्वीराज बाराते, पोउपनि.अनिकेत संकपाळ व अंमलदार यांनी राबविलेल्या प्रभावी नागरी कृती उपक्रमांमुळे दामरंचा हद्दीतील नागरीक माओवादाच्या प्रभावाला झुगारत मुख्य प्रवाहामध्ये येताना दिसून येत आहेत.
सन 2022 मध्ये एकूण 73, सन 2023 मध्ये 46 व मागील वर्षी 2024 मध्ये एकूण 26 भरमार बंदूका जिल्ह्रातील नागरिकांनी गडचिरोली पोलीस दलाकडे स्वाधीन केल्या होत्या. मागील तीन वर्षात इतक्या मोठ्या प्रमाणात भरमार बंदूका जिल्ह्रातील नागरिकांनी पोलीस दलाच्या स्वाधीन केल्या आहेत, हे पाहता येथील नागरिकांच्या मनात गडचिरोली पोलीस दलाप्रती विश्वास दृढ होताना दिसून येत आहे.
यासोबतच गडचिरोली पोलीस दलाच्या नागरी कृती उपक्रमांच्या प्रभावी अंमलबजावणीमुळे जिल्ह्रातील नागरिक आता माओवादाच्या भयापासून मुक्त होताना दिसून येत आहेत. याचेच उदाहरण म्हणजे उपविभाग कुरखेडाअंतर्गत कोरची येथील बाजारपेठ माओवाद्यांच्या हिंसक कारवायांमुळे जवळपास मागील 20 वर्षांपासून नक्षल सप्ताहादरम्यान काही दिवस बंद ठेवण्यात येत होती. मात्र यावर्षी तेथील व्यापारी आणि नागरिकांनी माओवाद्यांची दहशत झुगारुन बाजारपेठ सुरळीतपणे चालू ठेवली आहे. नक्षल सप्ताहादरम्यान नागरिकांनी दाखविलेल्या विश्वास आणि साहसाबद्दल पोलीस अधीक्षक नीलोत्पल यांनी नागरिकांचे अभिनंदन केले आहे. जनतेच्या संरक्षणासाठी गडचिरोली पोलीस दल नेहमीच सतर्क असल्याचा विश्वासही दिला आहे.
