गडचिरोली : नगर परिषदेच्या सार्वत्रिक निवडणुकीच्या मतदानादरम्यान कोणतीही गडबड होऊ नये आणि मतदान शांततेच्या आणि निर्भय वातावरणात व्हावे यासाठी पोलिसांनी चोख व्यवस्था सांभाळली. तीनही नगर परिषद क्षेत्रात 68 अधिकारी, 758 पोलीस अंमलदार आणि 250 होमगार्ड अशा एकूण 1076 मनुष्यबळाचा वापर त्यासाठी करण्यात आला. विशेष म्हणजे नगर परिषद हद्दीत अत्याधुनिक ड्रोनद्वारेही करडी नजर ठेवण्यात आली.
गडचिरोली, आरमोरी आणि देसाईगंज (वडसा) या तीनही ठिकाणी एकूण 105 मतदान केंद्रांवर मतदान झाले. यासाठी गडचिरोलीत 32 अधिकारी आणि 309 पोलीस अंमलदार तथा 100 होमगार्ड तैनात करण्यात आले होते. आरमोरी येथे एकूण 15 अधिकारी, 181 पोलीस अंमलदार व 75 होमगार्ड, तसेच देसाईगंज (वडसा) येथे 21 अधिकारी, 268 पोलीस अंमलदार व 75 होमगार्ड तैनात होते. याशिवाय गडचिरोली जिल्हा पोलीस दलासोबतच 2 आरसीपी पथक व 1 एसआरपीएफची कंपनी तैनात करण्यात आली होती.
पोलीस अधीक्षक नीलोत्पल यांच्या मार्गदर्शनाखाली ही निवडणूक सुरळीत पार पडण्यासाठी मतदान केंद्रांवरील बंदोबस्तासोबतच प्रत्येक 4 बुथसाठी एका अधिकाऱ्याचा समावेश असलेले विशेष पथक तैनात करण्यात आले होते. तसेच प्रत्येक पोलीस स्टेशन हद्दीत 5 चार्ली पेट्रोलींग वाहने तैनात होती. नगर परिषदेच्या सिमावर्ती भागात नाकाबंदी तैनात करुन करडी नजर ठेवण्यात आली. सर्व मतदान केंद्रावर आकाशमार्गाने सुक्ष्म पाहणी करण्यासाठी 3 अत्याधुनिक ड्रोनची मदत घेण्यात आली.
