गडचिरोली : राष्ट्रीय आपत्ती प्रतिसाद दल (NDRF), नागपूर यांच्या पथकाकडून गडचिरोली जिल्ह्यात 1 ते 11 एप्रिल 2025 या कालावधीत आपत्ती व्यवस्थापन जनजागृती, तसेच प्रात्याक्षिक आणि सराव कार्यक्रमांचे आयोजन करण्यात आले आहे. या उपक्रमाचा एक भाग म्हणून दि.2 एप्रिल रोजी सकाळी जिल्हाधिकारी कार्यालयातील नियोजन भवनात विशेष प्रशिक्षण कार्यक्रमाचे आयोजन करण्यात आले होते.
जिल्हाधिकारी अविश्यांत पंडा यांच्या मार्गदर्शनाखाली, निवासी उपजिल्हाधिकारी सुनील सूर्यवंशी, जिल्हा आपत्ती व्यवस्थापन अधिकारी निलेश तेलतुंबडे, एनडीआरएफचे पोलीस निरीक्षक ब्रिजेशकुमार यादव, जिल्हा आपत्ती व्यवस्थापन सहाय्यक प्रियंका ताजने यांच्या प्रमुख उपस्थितीत हा कार्यक्रम पार पडला.
सदर प्रशिक्षण उपक्रमातून जिल्ह्यातील आपत्ती व्यवस्थापन यंत्रणेची तयारी अधिक सक्षम करण्याच्या दृष्टीने व आपत्तीच्या काळात प्रभावी प्रतिसाद देण्यासाठी आवश्यक ती माहिती, कौशल्ये आत्मसात करण्याचे आवाहन जिल्हाधिकारी अविश्यांत पंडा यांनी प्रशिक्षणार्थी पथकाला केले.
या प्रशिक्षण सत्रात एनडीआरएफ पथकाद्वारे विविध विषयांवर सखोल माहिती देऊन प्रात्यक्षिके दाखविण्यात आली. यामध्ये आपत्ती व आपत्कालीन परिस्थिती, आपत्तीचे प्रकार (भूकंप, भुस्खलन, पूर, त्सुनामी, चक्रीवादळ, वीज पडणे, दुष्काळ, उष्णतेच्या लाटा, शितलहरी), घटना प्रतिसाद प्रणाली, आपदा मित्रांची भूमिका, कृत्रिम श्वासोच्छवास, चोकिंग, आपत्कालीन लिफ्टिंग आणि हालचाल, फायर सेफ्टी, जैविक, रासायनिक व आण्विक आपत्ती, गर्दी व्यवस्थापन, स्ट्रेचर तयार करणे, पीपीई किटचा योग्य वापर, प्राथमिक उपचार अशा अनेक महत्त्वपूर्ण बाबींचा समावेश होता.
या प्रशिक्षणामध्ये कोरची, कुरखेडा, देसाईगंज, आरमोरी या तालुक्यांतील महसूल, पोलीस, आरोग्य व महावितरण विभागातील बचाव पथक, तसेच स्थानिक आपदा मित्रांनी सहभाग घेतला. जिल्हा कार्यालयातील आपत्ती व्यवस्थापन कक्षातील सहायक महसूल अधिकारी स्वप्निल माटे, आपदा मित्र चंद्रशेखर मोलंगुरवार, कल्पक चौधरी, अजित नरोटे, मयूर किन्नाके यांचीही उपस्थिती होती.
