गडचिरोली : जिल्हाधिकारी अविश्यांत पंडा यांनी सोमवारी (दि.7) धानोरा तालुक्याला भेट देत आपत्ती व्यवस्थापन, मलेरिया नियंत्रण, राष्ट्रीय महामार्ग व महसूल यंत्रणा, तथा आरोग्यविषयक उपाययोजनांचा आढावा घेतला. पावसाळ्याच्या काळात तालुक्यातील प्रशासनाच्या विविध यंत्रणांना अधिक सक्रिय व सजग राहण्याच्या सूचना त्यांनी या दौऱ्यात दिल्या.
तहसील कार्यालय धानोरा येथे आयोजित आढावा बैठकीत सहायक जिल्हाधिकारी तथा उपविभागीय अधिकारी रणजित यादव, तहसीलदार आम्रपाली लोखंडे तसेच तालुकास्तरीय अधिकारी उपस्थित होते.
पूरप्रवण गावांसाठी नवसंजीवनी योजनेतून धान्य पोहोचले का याची चौकशी, मुसळधार पावसामुळे निर्माण होणाऱ्या पूरपरिस्थितीचा विचार करता पुराच्या काळात संपर्क तुटणाऱ्या गावांसाठी ‘नवसंजीवनी योजने’तून आवश्यक धान्य व औषधी उपलब्ध झाली का, याबाबत जिल्हाधिकारी पंडा यांनी अधिकाऱ्यांकडे विचारणा केली. आपत्ती व्यवस्थापण यंत्रणेने सजग राहण्याचे व पूरप्रवण ठिकाणी संभाव्य धोका निर्माण झाल्यास तातडीने वरिष्ठ प्रशासनाला कळविण्याचे निर्देश त्यांनी दिले.
मलेरिया प्रतिबंध व स्वच्छतेवर भर
पावसाळ्यादरम्यान मलेरिया व इतर साथीच्या आजारांचा प्रादुर्भाव टाळण्यासाठी आरोग्य विभागाने आवश्यक प्रतिबंधात्मक उपाययोजना कराव्यात, अशी सूचना जिल्हाधिकाऱ्यांनी केली. पावसाळ्यात ठिकठिकाणी ब्लिचिंग पावडरचा वापर करून परिसराची स्वच्छता राखणे, नागरिकांच्या आरोग्याची काळजी घेणे, ओलसर परिसरात डासांचे निर्मूलन करणे आदी बाबींचे काटेकोर पालन करण्याची सूचना त्यांनी केली.
राष्ट्रीय महामार्गाबाबत वाढल्या तक्रारी
धानोरा तालुक्यातून जाणाऱ्या राष्ट्रीय महामार्गाच्या स्थितीकडे लक्ष वेधत जिल्हाधिकाऱ्यांनी नागरिकांची गैरसोय टाळण्यासाठी तातडीने डागडुजी करण्याचे निर्देश दिले. जिल्ह्यातील राष्ट्रीय महामार्गासंबंधात नागरिकांच्या तक्रारी असून महामार्गाची दुरूस्ती व यासंबंधातील समस्या सोडविण्यासाठी महामार्ग प्राधिकरणाद्वारे गडचिरोली येथे किमान एका अधिकाऱ्याची नेमणूक करण्यात यावी, अशी सूचना त्यांनी राष्ट्रीय महामार्गाच्या मुख्यालयाशी दूरध्वनीवरून संपर्क साधून केली.
आश्रमशाळांमधील सुविधांची तपासणी
जिल्हाधिकाऱ्यांनी धानोरा तालुक्याील सोडे येथील आदिवासी शासकीय आश्रमशाळा व मुलींच्या वसतिगृहाला जिल्हाधिकाऱ्यांनी भेट देऊन तेथील व्यवस्थेची पाहणी केली. विद्यार्थ्यांच्या अभ्यास, पोषण आणि सुविधा याबाबत माहिती घेतली. तसेच अशा शाळांमध्ये नाविन्यपूर्ण काय उपक्रम राबविता येतील याविषयी चर्चा केली.
इंग्रजी माध्यम आश्रमशाळा व एकलव्य शाळेची पाहणी
या दौऱ्यादरम्यान गडचिरोलीतील शासकीय इंग्रजी माध्यम आश्रमशाळा व सेमाना येथील एकलव्य निवासी शाळेचीही जिल्हाधिकाऱ्यांनी पाहणी केली. येथे विद्यार्थ्यांसाठी उपलब्ध असलेल्या शैक्षणिक व निवासी सुविधांचा आढावा घेतला आणि गुणवत्तापूर्ण शिक्षणासोबतच विद्यार्थ्यांच्या सर्वांगीण विकासासाठी उपाययोजना राबवण्याचे सांगितले.
