गडचिरोली : युवकांना आपली कला-कौशल्ये आणि नवकल्पना प्रदर्शित करण्यासाठी एक हक्काचे व्यासपीठ मिळावे या उद्देशाने जिल्हास्तर युवा महोत्सव 2025-26 चे आयोजन येत्या 6 नोव्हेंबरला केले जाणार आहे. त्याच्या पूर्वतयारीसाठी अपर जिल्हाधिकारी नितीन गावंडे यांनी बैठक घेऊन सर्व संबंधित विभागांना नियोजनासंदर्भात निर्देश दिले.
6 नोव्हेंबर 2025 रोजी येथील जिल्हा क्रीडा संकुल, कॉम्प्लेक्स येथे आयोजित केल्या जात असलेल्या या महोत्सवात युवकांचा सर्वांगीण विकास करणे, संस्कृती व परंपरा जतन करणे, तसेच राष्ट्रीय एकात्मता वाढवणे हे प्रमुख उद्दिष्ट ठेवलेले आहे. जिल्ह्यातील सर्व पात्र युवक-युवतींनी मोठ्या संख्येने या महोत्सवात सहभागी होऊन आपल्या सुप्त कलागुणांना वाव देण्याचे आणि जिल्ह्याचे नाव राष्ट्रीय स्तरावर नेण्याचे आवाहन अपर जिल्हाधिकारी गावंडे यांनी केले.
या महोत्सवात 12 जानेवारी 2026 या तारखेनुसार 15 ते 29 वयोगटातील युवक-युवती सहभागी होऊ शकतील. जिल्ह्यातील कृषी महाविद्यालये, सर्व कनिष्ठ व वरिष्ठ महाविद्यालये, महिला मंडळ आणि विविध युवक मंडळांचे सदस्यही यात सहभागी होऊ शकतात. फक्त सहभागी युवक गडचिरोली जिल्ह्याचा रहिवासी असावा.
विविध कलांसाठी होणार स्पर्धा
या महोत्सवात लोकनृत्य, लोकगीत, कथालेखन, चित्रकला, वक्तृत्व स्पर्धा, काव्य लेखन, नवोपक्रम ट्रॅक (विज्ञान प्रदर्शन) आणि ‘विकसित भारत चॅलेंज ट्रॅक’ यासारख्या विविध स्पर्धांचे आयोजन करण्यात आले आहे. ‘विकसित भारत चॅलेंज ट्रॅक’चा उद्देश कृषी, कौशल्य विकास, शासकीय व्यवस्था यासारख्या क्षेत्रातील आव्हानांवर अभिनव उपाययोजना सुचवण्याची संधी युवकांना मिळणार आहे.
युवा महोत्सवात सहभागी होण्यासाठी प्रत्येक स्पर्धकाला भारत सरकारच्या ‘माय भारत’ पोर्टलवर (mybharat.gov.in) नोंदणी करणे अनिवार्य आहे. प्रवेश अर्ज (सांघिक व वैयक्तिक) आणि ओळखपत्र 4 नोव्हेंबर 2025 पर्यंत जिल्हा क्रीडा अधिकारी कार्यालय, गडचिरोली येथे किंवा ईमेलद्वारे (dsogad2@gmail.com) जमा करावे लागतील. या महोत्सवात प्राविण्य मिळवणाऱ्या संघ / कलाकारांना विभाग, राज्य आणि राष्ट्रीय स्तरावरील युवा महोत्सवात (10 ते 12 जानेवारी 2026 या कालावधीत नवी दिल्ली येथे) सहभागी होण्याची संधी मिळणार आहे. तसेच, प्रत्येक स्तरावर यशस्वी स्पर्धकांना रोख पारितोषिके देखील दिली जातील, अशी माहिती जिल्हा क्रीडा अधिकारी भास्कर घटाळे यांनी दिली.
