गडचिरोली : गोंडवाना विद्यापीठाच्या परिसरात ग्रामीण मत्स्यपालन उद्योजकता विकास केंद्राचे उद्घाटन जलजीविका केंद्र पुणे यांच्या पुढाकाराने करण्यात आले. यामध्ये शेतकरी, मत्स्यपालक, महिला बचत गट, युवक, तसेच उमेद, जिल्हा उद्योग केंद्र, अग्रणी बँका व इतर संस्थांचे प्रतिनिधी सहभागी झाले होते.
कार्यक्रमाचे उद्घाटन नागपूरच्या मत्स्य विज्ञान महाविद्यालयाचे अधिष्ठाता डॉ.सचिन बोंडे यांच्या हस्ते झाले. अध्यक्षस्थानी गोंडवाना विद्यापीठाचे प्र-कुलगुरू डॉ.श्रीराम कावळे होते. याप्रसंगी कुलसचिव डॉ.अनिल हिरेखण, व्यवस्थापन परिषद व अधिसभा सदस्य गुरुदास कामडी, नागपूरच्या मत्स्य विज्ञान महाविद्यालयाचे अधिष्ठाता डॉ.प्रशांत तेलवेकर, जलजीविका पुणेचे मुख्य कार्यकारी अधिकारी नीलकंठ मिश्रा, मत्स्यव्यवसाय विभागाचे सहाय्यक आयुक्त समीर डोंगरे आदी प्रामुख्याने उपस्थित होते.
या कार्यक्रमात ग्रामीण मत्स्यपालन उद्योजकता विकास केंद्राद्वारा निर्मित माहिती पुस्तिकेचे प्रकाशन व ओपन सोर्स संकेतस्थळाचे लोकार्पण मान्यवरांच्या हस्ते झाले. हे संकेतस्थळ मत्स्यपालन उद्योजक, शेतकरी उत्पादक संस्था, महिला बचतगट, स्टार्टअप्स व इतर लाभधारकांसाठी उपलब्ध आहे.
याप्रसंगी सहाय्यक आयुक्त समीर डोंगरे यांनी ‘गडचिरोली जिल्ह्यातील मत्स्यव्यवसायाची वाटचाल’ यावर मार्गदर्शन केले. संवाद सत्रामध्ये उपस्थित मान्यवरांसह बचत गट, उमेद, माविम, बँका व शेतकरी प्रतिनिधींनी सहभाग घेतला.
या कार्यक्रमासाठी मुख्य कार्यक्रम अधिकारी व प्रमुख स्वप्निल गिरडे, वैज्ञानिक अधिकारी गंधर्व पिलारे आणि विज्ञान व तंत्रज्ञान संसाधन केंद्र, गोंडवाना विद्यापीठ गडचिरोलीच्या चमुने महत्त्वपूर्ण योगदान दिले. कार्यक्रमाचे संचालन रेमा तावडे व अंकिता पाटील यांनी, तर दामिनी अखंड यांनी आभार मानले.
