देसाईगंज : येथील हनुमान वार्ड, राजेंद्र वार्डमधील श्री साईबाबा मंदिराच्या प्रांगणात गणेशोत्सवाच्या निमित्ताने मोफत आरोग्य तपासणी शिबिराचे आयोजन केले होते. शनिवारी सकाळी 11 ते 3 या वेळेत घेतलेल्या या शिबिराचा 375 नागरिकांनी लाभ घेत विविध तपासण्यात केल्या. (अधिक बातमी खाली वाचा)
या शिबिराचे उद्घाटन फित कापून माजी आमदार कृष्णा गजबे यांच्या हस्ते झाले. यावेळी अध्यक्ष म्हणून मोतीलाल कुकरेजा, तर विशेष अतिथी म्हणून आमदार रामदास मसराम, माजी नगराध्यक्ष शालू दंडवते, भाजपचे तालुकाध्यक्ष सुनील पारधी, भाजपचे शहराध्यक्ष सचिन खरकाटे, जेसा मोटवानी, अनिल मुलकुलवार, विलास ढोरे, किशोर तलमले, जेष्ठ कार्यकर्ते पंढरी नखाते, धनपाल मिसार, तसेच अनेक डॉक्टर उपस्थित होते.
या शिबिरात रक्तदाब, रक्तातील साखर, ईसीजी, दंत तपासणी (डॉ.अश्विन ढोले, वडसा), नेल्सन हॉस्पिटल नागपूर यांच्या तज्ज्ञ डॉक्टर्सकडून मोफत करण्यात आली. त्यासोबतच सृष्टी डोळ्यांचा दवाखाना, नंदनवन नागपूर यांच्या माध्यमातून मोफत डोळ्यांची तपासणी आणि मोफत चष्मे वाटप करण्यात आले.
शिबिरामुळे आरोग्य जागरूकता- गजबे
यावेळी आपल्या भावना व्यक्त करताना मा.आ.गजबे म्हणाले, समाजातील प्रत्येक घटकाच्या आरोग्याचा विचार करणे ही खरी समाजसेवा आहे. अशा शिबिरांमुळे सामान्य जनतेला मोफत तपासण्या व उपचार उपलब्ध होतात. यामुळे आरोग्याविषयी जागरूकताही वाढते. श्री साईबाबा मंदिर व गणेश उत्सव मंडळ सातत्याने समाजकार्यात पुढाकार घेतात, त्यांचे मी अभिनंदन करतो. नागरिकांनी नियमित आरोग्य तपासणी करून स्वत:च्या आणि कुटुंबाच्या आरोग्याची काळजी घ्यावी.
कार्यक्रमाचे संचालन शिक्षक रोकडे यांनी केले. प्रास्ताविक विलास ढोरे यांनी तर आभार प्रदर्शन श्री साई बालगणेश उत्सव मंडळाच्या पदाधिकाऱ्यांनी केले. यावेळी मंडळाचे पदाधिकारी, सदस्य आणि कार्यकर्ते मोठ्या संख्येने उपस्थित होते.
