गडचिरोली : भरतपूर येथे सुरू असलेल्या 5 व्या खेलो इंडिया राष्ट्रीय कुस्ती स्पर्धेत गोंडवाना विद्यापीठाचे प्रतिनिधीत्व करणाऱ्या पैलवान हितेश चंद्रभान सोनवाने याने झळाळक कामगिरी करून राष्ट्रीय पातळीवर गोंडवाना विद्यापीठाचा लौकिक वाढवला आहे. ग्रिको-रोमन प्रकारातील 60 किलो वजन गटात त्याने दमदार खेळ सादर करत कास्यपदक मिळवले.
हितेश सोनवाने याला एनआयएस कुस्ती प्रशिक्षक सुहास बनकर यांचे मार्गदर्शन लाभले. कठोर मेहनत, जिद्द आणि तांत्रिक कौशल्याच्या बळावर त्याने राष्ट्रीय स्पर्धेत प्रभावी कामगिरी करत पदकाची कमाई केली. या यशामुळे गोंडवाना विद्यापीठातील खेळाडूंना नवीन प्रेरणा मिळाली आहे.
कुलगुरू डॉ.प्रशांत बोकारे, प्र-कुलगुरू डॉ.श्रीराम कावळे, कुलसचिव डॉ.अनिल हिरेखण, शारीरिक शिक्षण विभागाच्या संचालक डॉ.अनिता लोखंडे व विद्यापीठातील सर्व क्रीडा प्रेमींनी सोनवाने यांचे अभिनंदन केले. भविष्यातही राष्ट्रीय आणि आंतरराष्ट्रीय पातळीवर आमचे विद्यार्थी आणखी मोठी कामगिरी करतील, असा विश्वास विद्यापीठाने व्यक्त केला आहे.
