गडचिरोली : जिल्ह्याच्या छत्तीसगड सीमेवर गडचिरोली पोलिसांसोबत झालेल्या चकमकीत 3 महिला माओवाद्यांसह 1 पुरूष माओवादी ठार झाला. त्यांचे मृतदेह हेलिकॅाप्टरने गडचिरोलीत आणण्यात आले. आत्मसमर्पित नक्षलींच्या मदतीने त्यांची ओळख पटविण्याचे काम सुरू आहे. मृतदेहाशेजारी तीन आधुनिक रायफलींसह एक 303 रायफल सापडली. त्यामुळे मृतांमध्ये काही वरिष्ठ कॅडरचे नक्षली असण्याची शक्यता वर्तवली जात आहे. आज त्यांची ओळख पटल्यानंतर ते नेमके कोणत्या पदावर कार्यरत होते, त्यांच्यावर किती इनाम होते हे स्पष्ट होईल.
गडचिरोली आणि छत्तीसगडच्या नारायणपूर जिल्ह्याच्या सीमेवरील कोपर्शीच्या जंगलात ही चकमक उडाली. या जंगलात गट्टा दलम, कंपनी क्रमांक 10 व इतर काही माओवादी दबा धरून बसले असल्याची गोपनीय माहिती मिळाल्यानंतर अपर पोलीस अधीक्षक (अभियान) एम.रमेश यांच्या नेतृत्वाखाली C-60 ची 19 पथके आणि सीआरपीएफ व शिघ्र कृती दलाची 2 पथके दोन दिवसांपूर्वी शोधमोहिमेवर निघाले होते.
प्रचंड पावसादरम्यान दोन दिवसानंतर पोलीस पथके बुधवारी सकाळी कोपर्शीच्या जंगलात पोहोचून शोधमोहीम राबवत असताना माओवाद्यांनी पोलीस पथकांवर गोळीबार सुरू केला. त्याला पोलीस पथकांनी चोख प्रत्युत्तर दिले. जवळपास आठ तास चाललेल्या चकमकीनंतर त्या परिसरात शोध घेतला असता एकूण 4 माओवाद्यांचे मृतदेह सापडले. त्यात 1 पुरुष आणि 3 महिला होत्या. घटनास्थळावरून 1 एसएलआर रायफल, 2 इन्सास रायफल आणि .303 रायफल जप्त असे शस्र जप्त करण्यात आले. एसएलआर, इन्सास यासारख्या स्वयंचलित रायफल वरिष्ठ कॅडरच्या नक्षलींकडे असतात. त्यामुळे ठार झालेल्या नक्षलींमध्ये नेमके कोण आहेत हे ओळख पटल्यानंतरच स्पष्ट होणार आहे.
विशेष म्हणजे कोपर्शीच्या जंगलात उर्वरित माओवाद्यांचा शोध घेण्यासाठी माओवादविरोधी अभियान सुरूच असल्याचे पोलीस अधीक्षक नीलोत्पल यांनी सांगितले.
