गडचिरोली : पावसाळ्यात संपर्क तुटणाऱ्या गावातील पूल प्रकल्पांच्या कामांना प्राथमिकता देऊन ही कामे प्राधान्याने पूर्ण करण्याच्या सूचना जिल्हाधिकारी अविश्यांत पंडा यांनी दिल्या आहेत.
राज्य अर्थसंकल्पात गडचिरोली जिल्ह्यासाठी मंजूर करण्यात आलेल्या 580 कोटी रुपयांच्या विविध विकास प्रकल्पांची सद्यस्थिती, निविदा प्रक्रिया, तांत्रिक मान्यता आणि प्रत्यक्ष कामांची पूर्वतयारी, तसेच राष्ट्रीय महामार्ग, राज्य मार्ग व जिल्हा परिषदेंतर्गत बांधण्यात येणाऱ्या रस्त्यांचा आढावा जिल्हाधिकारी अविश्यांत पंडा यांनी घेतला. सार्वजनिक बांधकाम विभागाच्या अधीक्षक अभियंता निता ठाकरे यांनी याबाबत माहिती सादर केली.
मार्च 2025 च्या अर्थसंकल्पात मंजूर 500 कोटींच्या रस्ते आणि पूल विकास योजना, तसेच सुमारे 80 कोटींचे प्रेक्षागृह, विश्रामगृह, प्रशासकीय इमारती, तसेच नियमित कामांचा यात समावेश होता. या प्रकल्पांच्या पार्श्वभूमीवर जिल्हाधिकारी पंडा यांनी संबंधित अधिकाऱ्यांना पावसाळ्यापूर्वी तातडीने अंमलबजावणी सुरू करण्यास सांगितले. तसेच नव्याने बांधकाम करायचे प्रेक्षागृह व शासकीय इमारतींसाठी चांगल्या आर्किटेक्चर कडून डिझाईन तयार करून घेण्याच्या सूचना दिल्या.
या बैठकीत सर्व संबंधित विभागांनी समन्वयाने काम करत विकासकामांना गती देण्याचे निर्देश जिल्हाधिकाऱ्यांनी दिले.
या बैठकीला राष्ट्रीय महामार्गाचे कार्यकारी अभियंता ऋषिकांत राऊत, तसेच सार्वजनिक बांधकाम व जिल्हा परिषदेचे संबंधित अधिकारी उपस्थित होते.
