गडचिरोली : दिवाळी सणाच्या पार्श्वभूमीवर तात्पुरत्या स्वरूपात फटाक्यांची साठवणूक व विक्री करण्यासाठी परवाना घेणे आवश्यक आहे. त्यासाठी अर्ज करण्याचे आवाहन प्रशासनाकडून करण्यात आले आहे. या परवान्याची मुदत 15 दिवसांची असून, अर्जदारांनी दिनांक 10 ऑक्टोबर 2025 पूर्वी जिल्हा दंडाधिकारी, गडचिरोली यांच्या कार्यालयात विहीत नमुन्यातील अर्ज सादर करणे बंधनकारक आहे.
संबंधित तहसीलदार तसेच नगर परिषद, नगर पंचायत किंवा ग्रामपंचायत यांनी अर्जदारांच्या विनंतीनुसार नियोजित जागेची सुरक्षिततेच्या दृष्टीने तपासणी करून नाहकरत प्रमाणपत्र द्यावे. तसेच पोलीस अधीक्षक गडचिरोली यांनी नियमांनुसार अर्जदारास चारित्र्य प्रमाणपत्र निर्गमित करणे आवश्यक राहील. अर्जासोबत पोलीस अधीक्षक कार्यालयाचे चारित्र्य प्रमाणपत्र, तहसीलदार कार्यालयाचा अहवाल, स्थानिक स्वराज्य संस्थेचे नाहकरत प्रमाणपत्र, नियोजित जागेचा अभिलेख, अर्जदाराचे आधार कार्ड व दोन पासपोर्ट आकाराचे फोटो जोडणे बंधनकारक आहे. इमारत किंवा जागा स्वतःच्या मालकीची नसल्यास घरमालकाचे संमतीपत्र देखील सादर करावे लागेल.
दुकान लावण्यासाठी असे आहेत नियम
नियमानुसार फटाक्यांचे दुकान अग्नीप्रतिरोधक साहित्यापासून बांधलेले, बंद आणि सुरक्षित असावे. दुकाने परस्परांपासून किमान तीन मीटर अंतरावर, तसेच संरक्षित क्षेत्रापासून किमान 50 मीटर अंतरावर असणे आवश्यक आहे. दुकाने समोरासमोर नसावीत. दुकानाच्या परिसरात तेल, गॅस किंवा खुल्या दिव्यांचा वापर करता येणार नाही, मात्र भिंतीला किंवा छताला बसविलेले विद्युत दिवे वापरता येतील. जिवंत विद्युत तारा उघड्या स्वरूपात नसाव्यात. प्रत्येक दुकानाला स्वतंत्र विद्युत स्विच असावा तसेच सर्व दुकानांसाठी एक मास्टर स्विच असणे बंधनकारक राहील. दुकानाच्या 50 मीटरच्या परिसरात आतिषबाजीवर बंदी राहील आणि एका ठिकाणी 50 पेक्षा जास्त दुकाने उभारण्यास परवानगी दिली जाणार नाही.
अर्जदारांनी सर्व कागदपत्रे आणि अटींची पूर्तता करून वेळेत अर्ज दाखल करावेत, असे आवाहन अतिरिक्त जिल्हादंडाधिकारी सुनील सूर्यवंशी यांनी केले आहे.
