गडचिरोली : गडचिरोली शहरात नगर परिषदेने खासगी भागीदारीतून हवेने फुगवलेल्या तंबूत वातानुकूलित सिनेमा थिएटर सुरू केले. त्याचे उद्घाटन गुरूवारी (दि.22) जिल्हाधिकारी अविश्यांत पंडा व आमदार डॉ.मिलिंद नरोटे यांच्या प्रमुख उपस्थितीत झाले. नगरपालिका क्षेत्रात उभारलेले अशा पद्धतीचे हे राज्यातील पहिले सिनेमा थिएटर आहे. या थिएटरचे व्यवस्थापन ‘पिक्चर टाईम’ही खासगी कंपनी करणार आहे. सरकारी तिजोरीतून यासाठी 50 लाखांची गुंतवणूक केली आहे. येणाऱ्या नफ्याचा 50-50 टक्के वाटा खासगी कंपनी आणि नगर परिषदेला मिळणार आहे.
थिएटरच्या उद्घाटनप्रसंगी नगर परिषदेचे मुख्याधिकारी सूर्यकांत पिदुरकर, भाजपचे जिल्हाध्यक्ष प्रशांत वाघरे, माजी नगराध्यक्ष योगिता पिपरे, माजी नगरसेवक प्रमोद पिपरे, सुरजीत रॉय, अनिल कुनघाडकर यांच्यासह अनेक मान्यवर उपस्थित होते.
जिल्हाधिकारी अविश्यांत पंडा यांनी यावेळी सांगितले की, “गडचिरोली शहरासाठी हा मनोरंजन क्षेत्रातील एक ऐतिहासिक क्षण आहे. जिल्हा नियोजन विकास निधीतून या सिनेमागृहासाठी 50 लाख रुपयांचा निधी मंजूर करून नगर परिषदेच्या माध्यमातून हे सिनेमागृह उभारण्यात आले आहे.” या सिनेमागृहात पुढील टप्प्यात किड्स झोन, फूड कोर्ट आणि विविध सुविधा सुरू करण्यात येणार आहेत. या सिनेमागृहाला मॉडेल सिनेमा थिएटर म्हणून विकसित केले जाईल, असे त्यांनी स्पष्ट केले.
या उपक्रमामुळे गडचिरोलीसारख्या आदिवासीबहुल, दुर्गम भागातील नागरिकांना दर्जेदार मनोरंजनाची सोय उपलब्ध होणार असून हे जिल्ह्याच्या सर्वांगीण विकासात आणखी एक सकारात्मक पाऊल ठरणार आहे. नागरिकांनी या सुविधेचा लाभ घेण्याचे आवाहनही त्यांनी केले.
आमदार डॉ.मिलिंद नरोटे यांनी आपल्या भाषणात, “हे सिनेमा थिएटर गडचिरोलीच्या सांस्कृतिक आणि मनोरंजन क्षेत्रात मानाचा तुरा ठरेल. येथे केवळ करमणूकप्रधानच नव्हे, तर सामाजिक प्रबोधन करणारे चित्रपटही दाखवण्यात येईल, त्यातून समाजाला सकारात्मक संदेश देता येईल” असे सांगितले.
मुख्याधिकारी सूर्यकांत पिदुरकर यांनी हे सिनेमागृह अल्पावधीत उभे राहण्यासाठी जिल्हाधिकारी पंडा व आमदार डॉ.नरोटे यांचे सहकार्य मोलाचे ठरल्याचे नमूद केले. कार्यक्रमाचे संचालन आनंद खुने यांनी, तर उपस्थितांचे आभार गणेश ठाकरे यांनी मानले.
असे आहे हे मोबाईल थिएटर
हे सिनेमा थिएटर विशेष प्रकारच्या हवेने फुगवलेल्या तंबूमध्ये तयार करण्यात आले आहे. त्यात वातानुकूलनाची सुविधा आहे. यामध्ये एकूण 120 प्रेक्षक बसण्याची व्यवस्था असून, दररोज 4 शो दाखविण्यात येणार आहेत.
