गडचिरोली : राष्ट्रीय ओबीसी महासंघ, बीसी वेल्फेअर असोसिएशन तेलंगणा व आंध्र प्रदेश यांच्या संयुक्त विद्यमाने 2 एप्रिल रोजी नवी दिल्लीतील जंतर-मंतरजवळ सकाळी 10 ते दुपारी 2 या कालावधीत मोठ्या उत्साहाने धरणे आंदोलन करण्यात आले. यात देशातील आणि महाराष्ट्रातून अनेक जण सहभागी झाले होते. गडचिरोलीतील पदाधिकाऱ्यांनीही त्यात सहभाग घेऊन मागण्यांना पाठिंबा दिला.
त्यात जातनिहाय जनगणना करण्यात यावी, केंद्रात ओबीसींचे स्वतंत्र मंत्रालय स्थापन करण्यात यावे, आरक्षणाची 50 टक्केची मर्यादा हटविण्यात यावी, क्रिमिलेअरची उत्पन्न मर्यादा 15 लक्ष करण्यात यावी, तेलंगणात वाढवलेले 42 टक्के ओबीसींचे आरक्षण 9 व्या सूचित टाकण्यात यावे, संविधानाच्या कलम 243 डी (6) व 243 टी (6) मध्ये सुधारणा करून स्थानिक स्वराज्य संस्थेत ओबीसींना 27 टक्के आरक्षणाचा कायदा करण्यात यावा, मंडल आयोग व स्वाभिनाथन आयोगाच्या सर्व शिफारशी लागू करण्यात याव्यात, शेतमजूर व शेतकऱ्यांना 60 वर्षे वयानंतर पेन्शन योजना लागू करण्यात यावी, महात्मा फुले व सावित्रीबाई फुले यांना संयुक्त भारतरत्न देण्यात यावे, ओबीसीसाठी लोकसभा व विधानसभा असे स्वतंत्र मतदार क्षेत्र स्थापन करण्यात यावे, केंद्र सरकारने वार्षिक अंदाजे बजेट तयार करताना एससी, एसटीप्रमाणे ओबीसींकरिता लोकसंख्येच्या प्रमाणात निधीची तरतूद करण्यात यावी, 2014 पासून केंद्रीय लोकसेवा आयोगाची प्रशासकीय सेवा परीक्षा पास करणाऱ्या परंतु नॉन क्रिमीलेअर प्रमाणपत्र असताना त्याचा चुकीचा अर्थ लावून डीओपीटीने आयएएस होण्यापासून वंचित ठेवलेल्या 314 हून अधिक विद्यार्थ्यांना तात्काळ नियुक्त्या देण्यात याव्यात, इत्यादी प्रमुख मागण्ंयासाठी हे आंदोलन करण्यात आले.
प्रामुख्याने तेलंगणाचे मुख्यमंत्री रेवंत रेड्डी यावेळी बोलताना म्हणाले, पंतप्रधान मी ओबीसी आहे म्हणून म्हणतात , परंतू 10 वर्षांपासून एकही योजना आणली नाही, ते जातनिहाय जनगणना करण्याचे टाळतात. यापुढे हे आंदोलन देशव्यापी करण्यात येईल असा इशारा आंदोलकांनी सरकारला दिला.
ओबीसी महासंघाचे राष्ट्रीय अध्यक्ष डॉ.बबनराव तायवाडे यांनी ओबीसींच्या संविधानिक मागण्या लवकरात लवकर मार्गी लावण्याचे आवाहन केंद्र शासनाला केले.
यावेळी बीसी वेल्फेअरचे अध्यक्ष श्रीनिवास जाजुला, खासदार असोदिन ओवेसी, खा.सुप्रिया सुळे, खा.नरेंद्र पटेल, खा.वर्षा गायकवाड, खा.प्रतिभा धानोरकर , खा.श्यामकुमार बर्वे, खा.प्रणिती शिंदे,खा.कन्निमोडी, खा.विल्सन, खा.मनोज कुमार झा, माजी खा.हनुमंत आप्पा रेड्डी, खा.शैलजा कुमारी, पंजाब काँग्रेस प्रेसिडेंट अमरेंद्रसिंग राजा, सिने अभिनेता सुमन, अभिनेत्री विजयंती, तेलंगणातील लोकसभा आणि राज्यसभेचे खासदार, राष्ट्रीय ओबीसी महासंघाचे महासचिव सचिन राजूरकर यांच्यासह गडचिरोली जिल्हा काँग्रेस कमिटीचे अध्यक्ष महेंद्र ब्राह्मणवाडे आणि देशभरातून मोठ्या संख्येने कार्यकर्ते उपस्थित होते.
