चामोर्शी : तालुक्यातील गुरुदेव स्पोर्टिंग क्लब, कृष्णनगर यांच्या वतीने आयोजित ग्रामीणस्तरीय फुटबॉल स्पर्धेचा समारोप व बक्षीस वितरण समारंभ उत्साहात पार पडला. याप्रसंगी प्रमुख पाहुणे म्हणून उपस्थित माजी खासदार तथा भाजपा अनुसूचित जनजाती मोर्चाचे राष्ट्रीय महामंत्री डॉ.अशोक नेते यांच्या हस्ते बक्षीस वितरण करण्यात आले.
आपल्या मनोगतात त्यांनी खेळाडूंच्या जिद्दीचे कौतुक करत त्यांना मार्गदर्शन केले. “खेळामुळे तरुणाईत एकात्मता, शिस्त आणि समाजासोबत बांधिलकी निर्माण होते. आपल्या गावातील तरुणांनी खेळात प्रगती करून चांगले यश मिळवावे. गावातील अडचणी व झालेल्या विकासकामांचा उल्लेख करत त्यांनी, मी सदैव आपल्या गावासोबत आहे, असा विश्वास गावकऱ्यांना दिला.
यावेळी कि.मो.प्र. सचिव रमेश भुरसे, भाजपचे जिल्हा महामंत्री प्रकाश गेडाम, सुनील बिश्वास, सुबिर मसिद, रतन सरकार, रजनिकांत बाला, नितेश बैरागी, सुमंत दास, प्रियोतोष मंडल यांच्यासह मोठ्या संख्येने गावातील नागरिक, खेळाडू उपस्थित होते.
या स्पर्धेच्या माध्यमातून गावातील तरुणाईत खेळाची आवड वाढवून आरोग्यदायी वातावरण निर्माण करण्याचा उद्देश साध्य झाल्याचे आयोजकांनी सांगितले.
