गडचिरोली : जिल्ह्रातील आदिवासी बांधवांच्या कलागुणांना वाव मिळावा, तसेच आदिवासी संस्कृतीचे जतन करण्याकरीता व्यासपीठ उपलब्ध व्हावे या उद्देशाने 25 ते 27 डिसेंबर दरम्यान गडचिरोली पोलीस दलामार्फत भव्य स्वरूपात “गडचिरोली महोत्सवा”चे आयोजन केले आहे. शासकीय कृषी महाविद्यालयात तीन दिवस चालणाऱ्या या महोत्सवासोबत दि.28 डिसेंबर रोजी “महामॅरेथॉन 2025 सिझन-3”चे आयोजन करण्यात आले आहे. (अधिक बातमी खाली वाचा)
या महोत्सवाचे विशेष आकर्षण आदिवासी समुह नृत्य स्पर्धा, वीर बाबुराव शेडमाके कबड्डी स्पर्धा व बिरसा मुंडा व्हॉलीबॉल स्पर्धा हे आहे. दुर्गम व अतिदुर्गम भागातून आलेल्या संघामध्ये सदर स्पर्धा रंगणार आहेत. तसेच गडचिरोली जिल्ह्रातील विविध बचत गट आणि विविध संस्था आपल्या उत्पादनांचे व वस्तुंचे स्टॉल लावणार आहेत. यासोबतच हस्तकलेच्या वस्तुंचे स्टॉल उपस्थित नागरीकांरीता उपलब्ध असणार आहेत. दि.26 व 27 डिसेंबरला सायंकाळी 6 ते 10 वाजतादरम्यान सांस्कृतिक कार्यक्रमांचे आयोजन करण्यात आले आहे.
या कार्यक्रमात महाराष्ट्रातील प्रसिध्द कलाकार सहभागी होणार आहेत. यामध्ये प्रसिद्ध गायक सुरेश वाडकर यांची संगीत मैफिल, तसेच हास्य कलावंत म्हणून प्रसिद्ध असलेले भारत गणेशपूरे, कुशल बद्रिके, हेमांगी कवी, ममता उईके (‘ओ सांगो’ गोंडी साँग फेम), निरंजन बोबडे (सारेगमप विजेता), माधुरी पवार (मराठी सिने अभिनेत्री), पद्मनाभन गायकवाड (गायक) व अर्जुन धोपटे (‘ओ सांगो’ गोंडी साँग फेम) हे आपली कला सादर करणार आहेत. तसेच गडचिरोली जिल्ह्रातील स्थानिक कलाकारांनीही यात सहभाग घेतला आहे.
दि.28 ला होणाऱ्या महामॅरेथॉन स्पर्धेत जिल्ह्रातील 14 हजारावर स्पर्धक सहभाग होणार असल्याचे पोलिसांनी कळविले. सदर स्पर्धेत वेगवेगळया वयोगटासाठी वेगवेगळे अंतर असून त्यामध्ये 21 किमी, 10 किमी, 5 किमी, 3 किमी. अशा गटात स्पर्धक धावतील. सर्व सहभागी धावपटूंना टी-शर्ट, मेडल, हुडी बॅग, प्रमाणपत्र, झुंबा सेशन, अल्पोपहार व विजेत्यांसाठी स्पर्धकांना पुरुष व महिला या वेगवेगळ्या दोन्ही गटात 51,000 रुपयांपासून 3 हजार रुपयांपर्यंत एकूण 4 लाख 14 हजार रुपयांच्या बक्षीसाचे वितरण करण्यात येणार आहे. सर्व खेळाडू व कलाकारांचा उत्साह द्विगुणीत करण्याकरीता नागरीकांनी या महोत्सवामध्ये सहभागी होण्याचे आवाहन पोलीस अधीक्षक नीलोत्पल यांनी केले आहे.
