चामोर्शी : मार्कंडा कंसोबा वनपरिक्षेत्रातील जंगलात वाघाचा वावर असल्याची नोंद वनविभागाने घेतली आहे. त्यामुळे नागरिकांनी पाळीव जनावरे जंगल परिसरात चराईसाठी नेताना खबरदारी घ्यावी, अशी सूचना वनपरिक्षेत्र अधिकारी तनुजा मोढाले यांनी केली आहे.
येनापूर, दुर्गापूर, मुधोली चक नं.2, लक्ष्मणपूर, गोलकर मुधोली, जैरामपूर, रामपूर, कढोली, अनखोडा, उमरी, चंदनखेडी, रायपूर, रामकृष्णपूर, बहादूरपूर, गुंडापल्ली, सुभाषग्राम, अडपल्ली, कोनसरी, कन्हाळगाव, रविंद्रपूर, धर्मपूर, सोमनपल्ली, आंबोली आणि वायगाव या भागातील ग्रामपंचायतींना याबाबत सूचित करण्यात आले आहे. त्यांना गावकऱ्यांमध्ये जनजागृती करावी, असे आवाहन वनविभागाने केले आहे. याशिवाय स्थानिक पोलीस ठाण्यांनाही सूचना देऊन दक्षता घेण्यास सांगितले आहे.
जंगलात कोणतीही अनोळखी हालचाल दिसल्यास त्याची माहिती वनविभागाला द्यावी, वनविभाग बारकाईने लक्ष ठेवून असल्याचे आरएफओ मोढाले यांनी सांगितले.
