गडचिरोली : लॉयड्स मेटल्स अँड एनर्जी लिमिटेडच्या (एलएमईएल) विविध प्रकल्पांचे उद्घाटन आणि कंपनीच्या भव्य एकात्मिक पोलाद प्रकल्पाचा पायाभरणी समारंभ आज (दि.22) राज्याचे मुख्यमंत्री देवेंद्र फडणवीस यांच्या हस्ते होणार आहे. यानिमित्ताने प्रगतीशील महाराष्ट्राच्या विकासात आणि गडचिरोली जिल्ह्याच्या औद्योगिक क्रांतीत एक नवा अध्याय सुरू होणार आहे. कोनसरी येथील प्रकल्पस्थळी हा कार्यक्रम होणार आहे. (अधिक बातमी खाली वाचा)
जिल्ह्यातील हेडरी येथे 5-दशलक्ष टन प्रतिवर्ष (एमटीपीए) लोहखनिज ग्राइंडिंग प्लान्टचा पहिला टप्पा, हेडरी ते कोनसरी या 10 एमटीपीए क्षमतेच्या स्लरी पाईपलाइन आणि कोनसरी येथे 4 एमटीपीए क्षमतेच्या पेलेट प्रकल्पाचे उद्घाटन करतील. दुपारी 12 वाजता होणाऱ्या या कार्यक्रमात ते 4.5 एमटीपीए क्षमतेच्या भव्य एकात्मिक पोलाद प्रकल्पाचे, 100 खाटांच्या रुग्णालयाचे आणि सीबीएसई पॅटर्नच्या शाळेचे भूमिपूजन करतील. सोमनपल्ली येथील एलएमईएलच्या कर्मचारी वसाहतीचेसुद्धा मुख्यमंत्री भूमिपूजन करतील.
गडचिरोली जिल्ह्याचे सहपालकमंत्री अॅड.आशिष जयस्वाल, आमदार धर्मरावबाबा आत्राम, आमदार मिलिंद नरोटे; एलएमईएलचे व्यवस्थापकीय संचालक बी.प्रभाकरन, गडचिरोली परिक्षेत्राचे उपमहानिरीक्षक अंकित गोयल, जिल्हाधिकारी अविश्यांत पांडा; माजी खासदार अशोक नेते, माजी आमदार डॉ.देवराव होळी, कोनसरीचे सरपंच श्रीकांत पावडे; पद्मश्री तुलसी मुंडा आणि इतर मान्यवर या भव्यदिव्य सोहळ्यात प्रामुख्याने उपस्थित राहतील.
रोजगाराला मिळतेय चालना
गेल्या काही वर्षांत एलएमईएलने सुरजागड लोहखाण आणि कोनसरी येथील डीआरआय तथा पेलेट प्रकल्प कार्यान्वयीत केल्यापासून स्थानिकांना मिळणाऱ्या रोजगारात लक्षणीय वाढ झाली आहे. आत्मसमर्पण केलेल्या नक्षलवाद्यांनाही कंपनीने उद्योग-केंद्रित कौशल्यांचे प्रशिक्षण दिले आहे आणि त्यांना समाजाच्या मुख्य प्रवाहात आणण्याच्या प्रक्रियेला मदत करण्यासाठी त्यांना प्रकल्पाच्या सेवेत सामावूनही घेतले आहे.
कोनसरी येथे विदर्भाच्या भव्य एकात्मिक पोलाद प्रकल्पाची पायाभरणी झाल्यामुळे, गडचिरोलीला देशाचे स्टील हब बनवण्याचे ऐतिहासिक स्वप्न साकार करण्याच्या दिशेने एक पाऊल टाकले जात आहे. 140 वर्षांहून अधिक वर्षांपूर्वी, गडचिरोली हे भारतीय स्टील उद्योगाचे जन्मस्थान होऊ शकले असते. पण ती वेळ आज आली आहे. आता खऱ्या अर्थाने गडचिरोलीच्या उदयाची वेळ आली आहे, अशी भावना यानिमित्ताने व्यवस्थापकीय संचालक बी.प्रभाकरन यांनी व्यक्त केली.
