सिलोंचा : आपल्या मुलाचा वाढदिवस शालेय विद्यार्थ्यांसोबत साजरा करून सर्व 168 विद्यार्थ्यांना पिण्याच्या पाण्यासाठी बॅाटल्सचे वाटप करण्याचा स्तुत्य उपक्रम वेलगूर येथील जिल्हा परिषदेच्या उच्च प्राथमिक शाळेत चुनारकर दाम्पत्याने राबवला.
शाळा व्यवस्थापन समितीच्या उपाध्यक्ष हर्षा दीपक चुनारकर यांचा मुलगा हर्षदीप याच जि.प.शाळेत पाचव्या वर्गात शिकतो. त्याचा वाढदिवस पालकांसह शाळेच्या संयुक्त विद्यमाने साजरा करण्यात आला. या छोटेखानी समारंभाच्या अध्यक्षस्थानी हर्षा चुनारकर, तर विशेष अतिथी म्हणून दीपक चुनारकर उपस्थित होते. याशिवाय मुख्याध्यापक प्रभाकर आचेवार, ज्येष्ठ शिक्षक रमेश कुसनाके, विनोद खांडेकर, गणेश सुर्तेकर, वंदना ऐलावार, शारदा रापर्तीवार, मिनाक्षी कुमरे , प्रियंका चुनारकर व शकुंतलाबाई गुरनुले आदि उपस्थित होते.
शालेय होतकरू आणि गरीब विद्यार्थ्यांबद्दल आपल्याला आस्था असून सामाजिक बांधिलकी म्हणून यापुढेही ही परंपरा शालेय विद्यार्थ्यांकरीता कायम राहिल, अशी भावना यावेळी दीपक चुनारकर यांनी व्यक्त केली. यापुर्वीही त्यांनी आपले पाल्य हार्दिका हिच्या वाढदिवसाप्रसंगी संपूर्ण शालेय विद्यार्थ्यांना नोटबुक व लेखन साहित्य वितरीत केले होते.
या कार्यक्रमाचे संचालन शिक्षक गणेश सुर्तेकर यांनी, तर आभार विनोद खांडेकर यांनी मानले.
