गडचिरोली : जिल्ह्यातील शेतकरी उत्पादन कंपन्या (एफ.पी.ओ.), महिला बचत गट आणि शेतकरी गटांना केंद्र व राज्य शासनाच्या विविध कृषी योजना आणि उपक्रमांची माहिती देण्यासाठी गुरूवारी जिल्हास्तरीय कार्यशाळेचे आयोजन करण्यात आले होते. ही कार्यशाळा कृषी तंत्रज्ञान व्यवस्थापन यंत्रणा (आत्मा), कृषी विभाग आणि जिल्हा अंमलबजावणी संस्था (स्मार्ट प्रकल्प) यांच्या संयुक्त विद्यमाने शासकीय फळ रोपवाटिका सोनापूर येथे पार पडली.
कार्यशाळेचे उद्घाटन जिल्हा उद्योग केंद्राचे महाव्यवस्थापक निलेश गायकवाड यांच्या हस्ते झाले. त्यांनी “The Package of Incentives 2019” या योजनेंतर्गत मिळणाऱ्या लाभांची माहिती देत शेतकऱ्यांनी याचा लाभ घेण्याचे आवाहन केले. तर आत्माच्या प्रकल्प संचालक तथा जिल्हा अधीक्षक कृषी अधिकारी प्रीती हिरळकर यांनी कृषी विभागाच्या विविध योजनांची माहिती दिली.
स्मार्ट प्रकल्पाच्या नोडल अधिकारी अर्चना कोचरे यांनी शासनाच्या योजनांचा फायदा घेताना एफ.पी.ओ. सशक्त करण्याचे महत्व सांगितले. महावितरणचे उपकार्यकारी अभियंता वाकडे यांनी शेतकरी कंपन्यांसाठी वीज जोडणी प्रक्रियेबाबत मार्गदर्शन केले. नागपूर येथील सनदी लेखापाल सुभाष रहांगडाले यांनी सविस्तर व्यवसाय आराखडा तयार करताना येणाऱ्या अडचणींचे विश्लेषण केले.
नायब तहसीलदार हेमंत मोहरे यांनी भाडेपट्टी करार, आवश्यक कागदपत्रे आणि कृषी आधारित उद्योगांसाठी लागणाऱ्या परवानग्यांविषयी माहिती दिली. तसेच अहेरीचे उपविभागीय कृषी अधिकारी आनंद गंजेवार यांनी कृषी विभागाच्या योजनांविषयी सविस्तर मार्गदर्शन केले. या कार्यशाळेचे सूत्रसंचालन कैलाश शहारे यांनी केले.
