गडचिरोली : राज्याचे मुख्यमंत्री तथा गडचिरोली जिल्ह्याचे पालकमंत्री देवेंद्र फडणवीस यांचा वाढदिवस गडचिरोलीत सेवाभावी उपक्रमांनी साजरा करण्यात आला. माजी खासदार तथा भाजपचे राष्ट्रीय महामंत्री (अनुसूचित जनजाती मोर्चा) डॅा.अशोक नेते यांच्या संकल्पनेतून व मार्गदर्शनात हे विविध समाजोपयोगी उपक्रम राबवण्यात आले.
यामध्ये समाजातील दुर्बल व वंचित घटकांना थेट लाभ होईल अशा चार महत्त्वपूर्ण उपक्रमांचा समावेश होता. दृष्टीहिन व दिव्यांग बांधवांसाठी सेन्सिटिव्ह स्टिकचे वितरण करण्यात आले. ही स्टिक दिशा, अडथळे यांची पूर्वसूचना देते. त्यामुळे स्वावलंबनासोबतच त्यांचा आत्मविश्वासही बळकट होतो.
बोदली येथील मतीमंद विद्यालयातील विद्यार्थ्यांना आवश्यक शैक्षणिक साहित्य पुरवण्यात आले. शिक्षणाचा आनंद आणि आत्मभान निर्माण करणारा हा उपक्रम विशेष स्वागतार्ह ठरला.
‘माणुसकीचा घास’ उपक्रमाअंतर्गत गडचिरोलीतील महिला व बाल रुग्णालयात उपचारासाठी आलेल्या रुग्णांच्या नातेवाईकांना मोफत अन्न पुरवण्यात आले. या उपक्रमामागे माणुसकीची भावना आणि उपाशी पोटाला दिलासा देण्याची जाणीव होती.
वडसा (देसाईगंज) व या परिसरातून आलेल्या अपंग मुलींना कपडे आणि सॅनिटरी साहित्य देण्यात आले. आत्मसन्मान आणि आपुलकीचा आधार देणारा हा उपक्रम विशेष कौतुकास्पद ठरला.
या कार्यक्रमांत प्रामुख्याने भाजपचे शहराध्यक्ष अनिल कुनघाडकर, शहर महामंत्री विनोद देवोजवार, माजी नगराध्यक्ष तथा आदिवासी आघाडीचे जिल्हा उपाध्यक्ष भूपेश कुळमेथे, झोपडपट्टी आघाडीचे जिल्हाध्यक्ष श्याम वाढई, अनुसूचित जाती आघाडीचे जिल्हा उपाध्यक्ष जनार्दन साखरे, कार्यालय प्रमुख फुलचंद वाघाडे, सामाजिक कार्यकर्त्या वर्षा नांदगावकर, महेंद्र वाघमारे आदी उपस्थित होते.
मुख्यमंत्री देवेंद्र फडणवीस यांच्या संवेदनशील नेतृत्वाची आणि मा.खा.डॉ.अशोक नेते यांच्या कृतीशील सहभागाची प्रचिती या सेवाभावी उपक्रमांतून गडचिरोलीकरांना अनुभवता आली.
