गडचिरोली : जिल्ह्यात राष्ट्रवादी काँग्रेस अजित पवार गटाचा एकामागून एक पक्षप्रवेशाचा धडाका सुरूच आहे. गेल्या काही दिवसात काँग्रेस आणि भाजपमधील अनेक पदाधिकाऱ्यांच्या पक्षप्रवेशानंतर आज संध्याकाळी महिला काँग्रेसच्या जिल्हाध्यक्ष अॅड.कविता मोहरकर यांनीही राष्ट्रवादी काँग्रेसमध्ये प्रवेश केला. माजी मंत्री आणि राष्ट्रवादी काँग्रेसचे नेते आमदार धर्मरावबाबा आत्राम यांनी पक्षाचा दुपट्टा घालून त्यांचे स्वागत केले. ऐन निवडणुकीला माहौल गरम असताना अचानक झालेल्या या घडामोडी काँग्रेससाठी धक्कादायक ठरल्या आहेत.
राष्ट्रवादी काँग्रेसची जाहीर प्रचारसभा आज संध्याकाळी प्रभाग क्र.11 मध्ये आ.धर्मरावबाबा आत्राम यांच्या उपस्थितीत झाली. यावेळी अॅड.मोहरकर यांच्यासह काही महिला आणि पुरूष पदाधिकारी तसेच कार्यकर्त्यांनीही पक्षप्रवेश केला.
या घडामोडींवर प्रतिक्रिया देताना मोहरकर म्हणाल्या, काँग्रेसच्या पदाधिकाऱ्यांकडून मला सतत डावलले जात होते. केवळ नगराध्यक्षपदाची उमेदवारी दिली नाही म्हणून मी पक्ष सोडला नाही. पण निवडणुकीच्या धामधुमीत पक्षाच्या महिला आघाडीची जिल्हाध्यक्ष असताना मला कोणत्याच कार्यक्रमात बोलवले जात नव्हे. प्रोटोकॅाल पाळल्या जात नव्हता. नगरसेवकपदांची उमेदवारी देताना काँग्रेसच्या कोणत्याच महिला कार्यकर्त्यांना न देता बाहेरील उमेदवारांना उमेदवारी देण्यात आली. मला काँग्रेसच्या नेत्यांबद्दल अजूनही आदर आहे, पण पदाधिकाऱ्यांकडून जातीपातीचे राजकारण केले जात होते याचे वाईट वाटते, असे अॅड.मोहरकर म्हणाल्या.
या पक्षप्रवेशाच्या वेळी राष्ट्रवादी महिला काँग्रेसच्या प्रदेश उपाध्यक्ष गीता हिंगे, राष्ट्रवादी युवती काँग्रेसच्या जिल्हाध्यक्ष तनुश्री आत्राम, रविंद्र ओल्लालवार, लिलाधर भरडकर, श्रीनिवास गोडसेलवार आणि निवडणूक रिंगणातील उमेदवार उपस्थित होते.
