देसाईगंज : आरमोरी विधानसभा क्षेत्राचे आमदार कृष्णा गजबे यांनी रविवारी सावंगीसह अनेक ठिकाणी जनसंवाद प्रचार दौरा करून कॉर्नर सभा घेतल्या. या भेटीत गावातील अनेक ज्येष्ठ नागरिकांनी त्यांना आशीर्वाद दिला. भाजपा कार्यकर्त्यांसह युवक, महिलांनीही त्यांचे उत्स्फूर्तपणे स्वागत करत आम्ही तुमच्या पाठीशी आहोत, असा संदेश दिला.
सावंगी येथे महिलांनी पारंपरिक पद्धतीने आरतीने ओवाळून स्वागत केले. गावातील तरुणी दिव्या प्रमोद राऊत हिने रांगोळीतून हुबेहूब साकारलेल्या आमदार कृष्णा गजबे यांच्या प्रतिमेने सर्वांचे लक्ष वेधून घेतले. तिच्या या अप्रतिम कलाकृतीला उपस्थितांनी भरभरून दाद दिली. भाजपा तालुका अध्यक्ष सुनील पारधी यांनी दिव्याला भाजपचा दुपट्टा देऊन तिचा सन्मान केला.
या कार्यक्रमादरम्यान, आ.गजबे यांनी गावकऱ्यांशी संवाद साधत त्यांचे प्रश्न जाणून घेतले. आपल्या कार्यकाळातील प्रगती आणि आगामी योजनांची माहिती देत नागरिकांचा विश्वास जिंकला. यावेळी तालुका अध्यक्ष सुनील पारधी, तालुका महामंत्री योगेश नाकतोडे, तालुका महामंत्री वसंतराव दोनाडकर, भाजपा तालुका महामंत्री मोहन गायकवाड, उपाध्यक्ष शंकर पारधी, बाजार समितीचे संचालक हिरालाल शेंडे, शक्ति केंद्रप्रमुख श्यामराव आलोने, माजी जिल्हा परिषद सदस्य वसंत ठाकरे, युवा कार्यकर्ते शुभम नागपूरकर यांच्यासह अनेक कार्यकर्ते उपस्थित होते.
