गडचिरोली : अनेक वर्षांपासून अल्प मानधनावर राबूनही प्राथमिक आरोग्य केंद्रातील महिला परिचरांच्या विविध समस्यांकडे शासन कानाडोळा करत आहे. त्यामुळे 19 ऑगस्ट रोजी सिटू संलग्नित अंशकालीन महिला परिचर संघटनेने एक दिवशीय धरणे आंदोलन करत याकडे लक्ष वेधले. गडचिरोली जिल्हा परिषदेसमोर अमोल मारकवार यांच्या नेतृत्वाखाली जिल्ह्यातील महिलांनी धडक देत धरणे दिले.
जिल्हा परिषदेचे मुख्य कार्यकारी अधिकारी आणि जिल्हा आरोग्य अधिकाऱ्यांना संघटनेच्या वतीने निवेदन देण्यात आले. अंशकालीन महिला परिचरांना प्रतीमहा किमान वेतन 21 हजार रुपये देण्यात यावे. संबंधित महिलांना चतुर्थ श्रेणी कर्मचाऱ्यांचा दर्जा देण्यात यावा. महिलांना वयाच्या 59 वर्षानंतर 5 हजार रुपये पेन्शन देण्यात यावे. अंशकालीन परिचरांना ग्रॅज्युएटी देण्यात यावी. थकीत मानधन त्वरीत देण्यात यावे. दरवर्षी भाऊबीज भेट म्हणून 5 हजार रुपये देण्यात यावे. बायोमॅट्रिकची सक्ती करण्यात येऊ नये. आयुर्वेदिक अॅलोपॅथिक डीस्पेन्सरी मध्ये अतिरिक्त साफसफाईचे काम करुन घेतल्यास मोबदला देण्यात यावा, अशा विविध मागण्या या निवेदनात करण्यात आल्या.
या धरणे आंदोलनाला शेतकरी कामगार पक्षाचे जिल्हा चिटणीस रामदास जराते, जिल्हा परिषद आरोग्य कर्मचारी संघटनेचे सोनकुसरे यांनी भेट देऊन समर्थन दिले. यावेळी अंशकालीन महिला परिचर संघटनेच्या अध्यक्ष माधुरी मेश्राम, कार्याध्यक्ष सुवर्णा दासरवार, कोष्याध्यक्ष अर्पणा भोयर, सरचिटणीस साबेरा शेख व शेकडो महिला परिचर उपस्थित होत्या.
