गडचिरोली : अनेक वेळा रुग्णाची गंभीर अवस्था पाहून तो जगेल की नाही, अशी शंका रुग्णाच्या नातेवाईकांना वाटत असते. पण आशा न सोडता प्रयत्नांची पराकाष्ठा करून जेव्हा डॅाक्टर त्या रुग्णाला पूर्णपणे बरे करतात, तेव्हा डॅाक्टरांमध्ये देव दिसायला लागतो. याचाच अनुभव एटापल्ली तालुक्यातील लॅायड्स काली अम्मल मेमोरियल हॉस्पिटलमध्ये घेण्यात आला. ऑर्गेनोफॉस्फरस विषबाधेमुळे अत्यंत गंभीर अवस्था झालेल्या एका महिलेवर प्रगत क्रिटिकल केअर सुविधा आणि प्रयत्नांची पराकाष्ठा करत अनेक दिवस व्हेंटिलेटरवर ठेवून उपचार करण्यात आले. अखेर त्या प्रयत्नांना यश आले आणि अनेक महत्वाच्या अवयवांवर विषबाधेचा परिणाम होऊनही ती महिला सुखरूप त्यातून बाहेर आली.
रुग्णालयाकडून मिळालेल्या माहितीनुसार, परसलगुंडी गावातील या मध्यमवयीन महिलेला गेल्या 28 डिसेंबर 2025 रोजी बेशुद्धावस्थेत लॅायड्स काली अम्मल रुग्णालयात आणले होते. श्वसनास तीव्र त्रास आणि फुफ्फुसांमध्ये गंभीर गुंतागुंत झाली होती. डॉक्टरांनी ऑर्गेनोफॉस्फरस विषबाधेचे निदान करून तात्काळ आपत्कालीन जीवनरक्षक उपचार सुरू केले. रुग्णाला इंट्युबेट करून आयसीयूमध्ये दाखल करण्यात आले व मेकॅनिकल व्हेंटिलेटरवर ठेवण्यात आले. दीर्घकाळ व्हेंटिलेटरवर अवलंबून राहिल्यामुळे नंतर ट्रॅकिओस्टॉमी करण्यात आली.
सदर महिला 15 दिवस आयसीयूमध्ये उपचाराखाली होती. या काळात विषाच्या दुष्परिणामांमुळे मेंदू, हृदय व फुफ्फुसांसह अनेक अवयवांवर परिणाम झाला होता. तिच्या फुफ्फुसावर सूज (अॅक्युट पल्मोनरी एडिमा) आली होती. तसेच दोन वेळा झटकेही आले होते, त्यामुळे तिची प्रकृती अत्यंत गंभीर बनली होती.
डॉक्टरांच्या म्हणण्यानुसार, या संपूर्ण काळात या रुग्णांवर सतत निरीक्षण आवश्यक होते. सर्व गुंतागुंती असूनही रुग्णाने हळूहळू उपचारांना प्रतिसाद दिला. बहुवैद्यकीय तज्ज्ञांच्या सातत्यपूर्ण प्रयत्नांमुळे तिला यशस्वीरित्या व्हेंटिलेटरवरून काढण्यात आले आणि सर्वसामान्य अवस्थेत आल्यानंतर घरी सोडण्यात आले.
या उपचारांचे नेतृत्व मेडिसिन तज्ज्ञ डॉ.चेतन, भूलतज्ज्ञ डॉ.धीरज आणि ईएनटी तज्ज्ञ डॉ.महेंद्र यांनी केले. संपूर्ण उपचारांचे समन्वय वरिष्ठ वैद्यकीय अधीक्षक डॉ.गोपाल रॉय यांच्या मार्गदर्शनाखाली करण्यात आले.
एलएमईएलचे व्यवस्थापकीय संचालक बी.प्रभाकरन यांनी गडचिरोलीसारख्या दुर्गम भागात अत्याधुनिक क्रिटिकल केअर सुविधा असलेले रुग्णालय उभारल्याबद्दल रुग्णाच्या नातेवाईकांनी आभार मानले, तसेच संचालिका कीर्ती रेड्डी यांच्या सातत्यपूर्ण मार्गदर्शन व प्रोत्साहनाबद्दल कृतज्ञता व्यक्त केली.
