गडचिरोली : लॉयड्स मेटल्स अँड एनर्जी लिमिटेड आणि लॉयड्स इन्फिनिट फाऊंडेशन यांच्या संयुक्त विद्यमाने राबविण्यात येणाऱ्या शालेय सहाय्यता कार्यक्रमाअंतर्गत जिल्हा परिषद हायस्कूल, कोनसरी येथे विद्यार्थ्यांना मोफत शालेय पाठ्यपुस्तकांचे वितरण करण्यात आले.
या उपक्रमाअंतर्गत इयत्ता 9 वी, 10 वी, 11 वी आणि 12 वीमध्ये शिक्षण घेणाऱ्या एकूण 83 विद्यार्थ्यांना शालेय पाठ्यपुस्तकांचे वितरण करण्यात आले. विद्यार्थ्यांना आवश्यक शैक्षणिक साहित्य उपलब्ध करून त्यांच्या शिक्षणाला बळकटी देणे आणि गुणवत्तापूर्ण शिक्षणासाठी प्रोत्साहन देणे हा या उपक्रमाचा मुख्य उद्देश होता.
या कार्यक्रमाच्या अध्यक्षस्थानी जिल्हा परिषद हायस्कूल कोनसरीचे मुख्याध्यापक कोहाडे, तर प्रमुख अतिथी म्हणून उपस्थित लॉयड्स मेटल्स अँड एनर्जी लिमिटेडचे प्रशासन विभाग प्रमुख बेणूगोपाल यांनी विद्यार्थ्यांना शिक्षणाचे महत्त्व, सातत्यपूर्ण प्रयत्न आणि उज्ज्वल भविष्यासाठी कठोर परिश्रमाची गरज याविषयी मार्गदर्शन केले.
याप्रसंगी शाळेतील शिक्षक, शिक्षकेतर कर्मचारी तसेच लॉयड्स मेटल्सच्या कॉर्पोरेट सामाजिक दायित्व (सीएसआर) विभागातील अधिकारी व कर्मचारी उपस्थित होते. या उपक्रमामुळे विद्यार्थ्यांना शैक्षणिक साहित्याची मोलाची मदत मिळाल्याने विद्यार्थी व पालकांनी लॉयड्स मेटल्स व इन्फिनिट फाऊंडेशनच्या सामाजिक बांधिलकीच्या या उपक्रमाचे कौतुक करत समाधान व्यक्त केले.
