गडचिरोली : गोंडवाना विद्यापीठामध्ये आज दि.10 रोजी सकाळी 11 वाजता स्वातंत्र्यवीर विनायक दामोधर सावरकर साहित्य अध्यासन केंद्राचे उद्घाटन होणार आहे. कुलगुरू डॉ.प्रशान्त बोकारे यांच्या अध्यक्षतेखाली आणि प्र-कुलगुरू डॉ.श्रीराम कावळे यांच्या प्रमुख उपस्थितीत होणाऱ्या या सोहळ्याला मुंबई विद्यापीठाच्या अकॅडमी ऑफ थिएटर आर्ट्सचे संचालक व अभिनेते प्रा.योगेश सोमण हे विशेष अतिथी म्हणून उपस्थित राहणार आहेत.
प्रा.सोमण यांचा स्वातंत्र्यवीर सावरकर या विषयावर गाढा अभ्यास असून ते उपस्थितांना त्याविषयी मार्गदर्शनही करणार आहेत. दृश्यम, दृश्यम-2, उरी यासारख्या हिंदी चित्रपटातील अभिनयाने ते सर्वपरिचित आहेत.
अध्यासन केंद्राच्या वतीने घेण्यात आलेल्या बोधचिन्ह स्पर्धेतील प्रथम, द्वितीय व तृतीय विजेत्यांना अनुक्रमे रोख रक्कम 5 हजार, 3 हजार व 2 हजार तसेच प्रमाणपत्र देऊन मान्यवरांच्या हस्ते सन्मानित करण्यात येणार आहे. या सोहळ्याला उपस्थित राहण्याचे आवाहन कुलसचिव डॉ.अनिल हिरेखण यांनी केले आहे.
