गडचिरोली : दुर्गम-अतिदुर्गम भागातील विद्यार्थ्यांना स्पर्धा परीक्षेची जाणीव व्हावी, त्यांना वाचनाची आणि स्पर्धा परीक्षेची ओढ निर्माण व्हावी यासाठी पोलिसांच्या पुढाकाराने ‘प्रोजेक्ट उडान’अंतर्गत सामान्य ज्ञान परीक्षा घेण्यात आली. सोमवारी (दि.27) जिल्ह्यातील 112 शासकीय व निमशासकीय आश्रमशाळांमधील 23 हजार 935 विद्यार्थी यात सहभागी झाले.
दुर्गम भागातील विद्यार्थ्यांना योग्य मार्गदर्शन व संधीचा अभाव आहे. स्पर्धा परीक्षेबद्दल असलेल्या अज्ञानामुळे हे विद्यार्थी स्पर्धा परिक्षेत मागे पडतात. त्यामुळे त्यांच्या उज्वल भविष्याची वाटचाल सुरू व्हावी व त्यांचा स्पर्धा परीक्षेकडे कल वाढावा यासाठी पोलीस अधीक्षक नीलोत्पल यांच्या मार्गदर्शनाखाली 20 ऑगस्ट 2024 पासून ‘वीर बाबुराव शेडमाके सामान्य ज्ञान स्पर्धा’ या उपक्रम सुरु करण्यात आला आहे.
यासाठी जिल्ह्रातील 112 शासकीय व निमशासकिय आश्रमशाळांमधील 1 समन्वय शिक्षक व आश्रम शाळा ज्या पोस्टे / उपपोस्टे/ पोमकें मधील 1 समन्वय पोलीस अधिकारी व पोलीस अंमलदार यांचा सामान्य ज्ञान व्हॅाट्सअप ग्रुप तयार करण्यात आला. त्याद्वारे आश्रम शाळांना व्हॉट्सअॅपव्दारे रोज 10 प्रश्न पाठविण्यात येत होते. आश्रम शाळेतील समन्वय शिक्षक दैनंदिन परिपाठामध्ये विद्यार्थ्यांना प्रश्न विचारुन त्यांची उत्तरे स्पष्टीकरणासह सांगत होते. अशा प्रकारे सदर उपक्रम 6 महिने चालविल्यानंतर सोमवारी ‘वीर बाबुराव शेडमाके सामान्य ज्ञान वार्षिक स्पर्धा’ घेण्यात आली.
सदर परीक्षेत सहभागी गुणवत्तापूर्ण विद्यार्थ्यांना सन्मानचिन्ह, प्रमाणपत्र व रोख पारितोषिक देऊन गौरविण्यात येणार आहे. विशेष म्हणजे जानेवारी 2024 मध्ये नव्याने स्थापन झालेल्या पोमकें गर्देवाडा हद्दीतील भगवंतराव आश्रमशाळेच्या 116 विद्यार्थ्यांनीही ही परीक्षा दिली. यासोबतच अपर पोलीस अधीक्षक (प्रशासन) एम.रमेश यांनी परीक्षेदरम्यान शासकीय इंग्रजी माध्यम आश्रमशाळा, गडचिरोली व एकलव्य रेसिडेन्शिअल इंग्लिश मिडीयम स्कुल, गडचिरोली (चामोर्शी) येथे भेट देऊन उपस्थित सर्व परिक्षार्थी विद्यार्थ्यांना मार्गदर्शन केले.
यासाठी सर्व उपविभागीय पोलीस अधिकारी, सर्व पोस्टे/ उपपोस्टे / पोमकेचे सर्व प्रभारी अधिकारी व सर्व समन्वय अधिकारी, आश्रमशाळेतील सर्व मुख्याध्यापक व समन्वय शिक्षक तसेच नागरी कृती शाखेचे प्रभारी अधिकारी पोउपनि. धनंजय पाटील, पोउपनि. चंद्रकांत शेळके, अंमलदार रविंद्र कंकलवार आदींनी मोठे परिश्रम घेतले.
