गडचिरोली : नगर परिषद निवडणुकीच्या प्रचारासाठी एक दिवस अतिरिक्त मिळाल्याने मतदानाच्या पूर्वसंध्येपर्यंत, म्हणजे दि.1 च्या रात्री 10 वाजेपर्यंत प्रचार करता येणार आहे. यामुळे घोडेबाजाराला आणखी जोर चढणार आहे. दरम्यान कालपासून वाहनांवरील भोंग्यांच्या प्रचाराने सर्वत्र वेग घेतला आहे. विविध गाण्यांच्या चालीवर पक्ष आणि उमेदवारांचे नाव मतदारांवर बिंबवण्याचा प्रयत्न यातून होत आहे. त्यात आज (शनिवारी) भाजप उमेदवारांच्या प्रचारासाठी मुख्यमंत्री देवेंद्र फडणवीस यांची जाहीर सभा गडचिरोलीत होणार आहे.
आरमोरी नगर परिषदेची यावेळी दुसरी निवडणूक होत आहे. ग्रामपंचायतचे थेट नगर परिषदेत रूपांतर झाल्यानंतर झालेल्या पहिल्या निवडणुकीत भाजपने एकहाती बहुमत मिळवले होते. पण पाच वर्षाचा कार्यकाळ संपल्यानंतर निवडणुकाच झाल्या नसल्याने प्रशासकराज होते. आता बऱ्याच प्रतीक्षेनंतर निवडणूक होत असल्याने नागरिकांमध्ये उत्साहाचे वातावरण दिसत आहे.
भाजपसह राष्ट्रवादी काँग्रेस (एपी), काँग्रेस, शिवसेना, बसपा या पक्षांनी आपापल्या परीने जोर लावला आहे. मात्र नगर परिषदेच्या निर्मितीचे शिल्पकार अरविंद सावकार आणि प्रकाश सावकार पोरेड्डीवार यांच्या नेतृत्वात पुन्हा एकदा नगर परिषदेवर भाजपचीच सत्ता बसेल, असा विश्वास भाजपचे आरमोरी तालुका अध्यक्ष पंकज खरवडे यांनी व्यक्त केला. विकासाचे व्हिजन असणाऱ्यांनाच मतदार कौल देतील, असे त्यांनी ठामपणे सांगितले.
