गडचिरोली : ‘माल लगाओ, माल कमाओ’ हा धंदा झाला आहे. पाकिटमारांनी पाकिटं तयार करण्याचे काम सुरू केले आहे. म्हणून येणाऱ्या 1 तारखेला होणाऱ्या पैशाच्या ‘अतिवृष्टी’पासून सावध राहा. कितीही अतिवृष्टीचा भडीमार झाला तरीही विकासाचं व्हिजन असणाऱ्या काँग्रेसच्या कविता पोरेड्डीवार यांना निवडून द्या, असे आवाहन काँग्रेस नेते विजय वडेट्टीवार यांनी शुक्रवारी गडचिरोलीत झालेल्या प्रचारसभेत केले.
भाजप कार्यालयाच्या उद्घाटनप्रसंगी मंत्री चंद्रशेखर बावनकुळे यांनी काँग्रेसमधील अंतर्गत गटबाजीकडे लक्ष वेधले होते. त्याला वडेट्टीवार यांनी उत्तर देत तुमच्या पक्षातील लोकांची तोंडं एकमेकांकडे आहे का? असा सवाल केला. सरकारने महिलांना दिड हजार रुपये देताना दुसरीकडे महागाई दिली. इलेक्ट्रिक बिलात लूट केली जात आहे. समाजात भांडणं, धार्मिक तेढ निर्माण करून आपली पोळी शेकण्याचं काम केलं, अशी टिका त्यांनी केली.
नक्षलवाद कमी झाला, पण त्यासाठी पोलिसांनी मेहनत घेतली, पण श्रेय दुसरेच घेतात, असा टोला त्यांनी लगावला. महिलांना 50 टक्के आरक्षणाचा अधिकार काँग्रेसने दिला. एकदा आमच्यावर विश्वास टाका, गडचिरोली शहर बदलून दाखविल्याशिवाय राहणार नाही, असे वडेट्टीवार म्हणाले.
