गडचिरोली : अपघातात गंभीर जखमी झालेल्या 51 वर्षीय इसमावर लॅायड्स काली अम्मल मेमोरियल हॉस्पिटल हेडरी–सुरजागड येथे अनेक गुंतागुंतीच्या शस्रक्रिया यशस्वीरित्या पूर्ण करून मृत्यूच्या दारातून परत आणण्यात आले. त्यांच्या प्रकृतीत आता चांगली सुधारणा झाली असून त्यांना एक प्रकारचे नवजीवन मिळाले आहे.
बाजीराव सडमेक (51 वर्ष) असे त्या रुग्णाचे नाव आहे. गेल्या 4 ऑगस्ट रोजी एका अपघातात गंभीर जखमी झाल्यानंतर त्यांना दुसऱ्या दिवशी, दि.5 रोजी प्राथमिक आरोग्य केंद्रातून लॅायड्सच्या काली अम्मल रुग्णालयात आणण्यात आले. रुग्णालयात दाखल करण्यात आले तेव्हा त्यांची प्रकृती अत्यंत गंभीर होती. त्यांचा रक्तदाब अतिशय कमी होता, पोटाला गंभीर दुखापत झाली होती. तसेच दोन्ही पायांच्या खालच्या भागातील दोन्ही हाडांना उघडे फ्रॅक्चर झाले होते. त्यांचा उजवा पायही मोठ्या प्रमाणात विकृत झाला होता.
आपत्कालीन विभाग आणि आयसीयूच्या पथकाने त्यांची प्रकृती स्थिर करण्यासाठी तातडीने उपचार सुरू केले. वैद्यकीय तपासणीत लहान आतड्याला तीन ठिकाणी छिद्रे पडल्याचे आढळून आले. त्यामुळे हवा आणि आतड्यातील द्रव व घटक पोटाच्या पोकळीत गळत होते. ही स्थिती जीवघेणी होती आणि तातडीने शस्त्रक्रिया करणे आवश्यक होते.
6 ऑगस्ट रोजी आपत्कालीन पोटाची शस्त्रक्रिया यशस्वीपणे करण्यात आली. या शस्त्रक्रियेदरम्यान आतड्याला पडलेली तिन्ही छिद्रे बंद करण्यात आली. त्यानंतर रुग्णाला आयसीयूमध्ये हलविण्यात आले. तेथे त्यांच्यावर बारकाईने देखरेख ठेवण्यात आली. त्यांना शिरेतून द्रवपदार्थ, अँटिबायोटिक्स, रक्त देणे तसेच इतर आवश्यक सहायक उपचार देण्यात आले.
उपचारादरम्यान डॉक्टरांना त्यांच्या पायाच्या खोल नसांमध्ये रक्ताची गुठळी तयार झाल्याचा संशय आला. वैद्यकीय तपासणीनंतर रक्त पातळ करण्यासाठी हेपेरिन हे औषध सुरू करण्यात आले.
रुग्णाची एकूण प्रकृती सुधारल्यानंतर आणि शस्त्रक्रियेसाठी ते वैद्यकीयदृष्ट्या सक्षम झाल्यावर 31 ऑगस्ट रोजी दोन्ही फ्रॅक्चर झालेल्या पायांवर एकाच शस्त्रक्रियेत उपचार करण्यात आले. फ्रॅक्चर स्थिर करण्यासाठी पायांच्या हाडांच्या आत धातूचे रॉड्स बसविण्यात आल्या. ही प्रक्रिया कोणत्याही गुंतागुंतीशिवाय यशस्वीपणे पूर्ण झाली.
रुग्णाने उपचार आणि पुनर्वसनाला चांगला प्रतिसाद दिला. फिजिओथेरपी पथकाच्या मदतीने पायांच्या शस्त्रक्रियेनंतर तिसऱ्या दिवसापासूनच त्यांनी पायांवर वजन देत उभे राहणे आणि चालणे सुरू केले. आता ते परिचारकांच्या मदतीशिवाय वॉकरच्या सहाय्याने चालण्यास सक्षम आहेत.
या यशस्वी उपचारामध्ये जनरल सर्जरी, ऑर्थोपेडिक्स, अॅनेस्थेशिया, क्रिटिकल केअर, इंटरनल मेडिसिन, नर्सिंग, आपत्कालीन विभाग, ऑपरेशन थिएटर आणि फिजिओथेरपी या विभागांच्या पथकांनी समन्वयाने महत्त्वपूर्ण भूमिका बजावली.
लॉयड्स मेटल्स अँड एनर्जी लिमिटेडचे व्यवस्थापकीय संचालक बी.प्रभाकरन यांनी या गंभीर आणि जीव वाचविणाऱ्या उपचारात सहभागी डॉक्टर आणि इतर कर्मचाऱ्यांच्या पथकाचे अभिनंदन केले. रुग्णालयात उपलब्ध करून देण्यात येत असलेल्या सुविधा आणि सेवांबद्दल प्रभाकरन यांनी समाधान व्यक्त केले. या सुविधा आणि सेवा दुर्गम भागात राहणाऱ्या नागरिकांसाठी वरदान ठरत असल्याचे त्यांनी सांगितले. स्थानिक समुदायाला शक्य ती सर्व मदत आणि सहकार्य देण्यासाठी LKAMH सदैव कटिबद्ध राहील, अशी ग्वाही त्यांनी दिली.
