गडचिरोली : महाराष्ट्र राज्य सहकारी बँक्स असोसिएशन मुंबईतर्फे रौप्य महोत्सवी वर्षानिमित्त विष्णू अण्णा पाटील जीवन गौरव पुरस्काराने ज्येष्ठ सहकार नेते अरविंद सावकार पोरेड्डीवार यांना सन्मानित करण्यात आले. या बहुमानानंतर त्यांचे मंगळवारी (दि.१२) गडचिरोलीत आगमन होत आहे. त्यामुळे विविध क्षेत्रातील व्यक्तींकडून त्यांचा अभिनंदन सोहळा आयोजित करण्यात आला आहे.
गडचिरोलीसारख्या मागास, दुर्गम, नक्षलग्रस्त जिल्हा म्हणून ठप्पा लागलेल्या जिल्ह्यातून सहकारातील उत्कृष्ट प्रशासनाचा आदर्श निर्माण केल्याने अरविंद सा.पोरेड्डीवार हे विष्णू अण्णा पाटील जीवन गौरव पुरस्काराचे मानकरी ठरले. त्यांच्या रूपाने गडचिरोली जिल्ह्याला हा सन्मान मिळाल्यामुळे जिल्ह्यातील विविध क्षेत्रातील व्यक्तींनी त्यांच्या या अभिनंदन सोहळ्याचे आयोजन केले आहे.
१२ सप्टेंबर रोजी दुपारी १ वाजता जिल्हा बँकेच्या मुख्य कार्यालयात हा कार्यक्रम होणार आहे. तत्पूर्वी इंदिरा गांधी चौकातही त्यांचे स्वागत करणार असल्याचे काही कार्यकर्त्यांनी सांगितले. जिल्ह्याच्या सहकार, सामाजिक, शैक्षणिक व सांस्कृतिक अशा विविध क्षेत्रातील व्यक्ती व कार्यकर्त्यांनी या कार्यक्रमाचे आयोजन केले आहे.
