अहेरी : तालुक्यातील बोरी नजीकच्या शिवणीपाठ येथील जिल्हा परिषद प्राथमिक शाळेत 26 जून रोजी राजर्षी शाहू महाराज जयंती “सामाजिक न्याय दिन” म्हणून मोठ्या उत्साहात साजरी करण्यात आली.
कार्यक्रमाच्या अध्यक्षस्थानी अहेरी पंचायत समितीचे माजी सदस्य तथा युवा नेते हर्षवर्धनबाबा आत्राम होते. प्रमुख अतिथी म्हणून सरपंच मीना वेलादी, शाळा व्यवस्थापन समितीचे अध्यक्ष हनमंतु कुळमेथे, माजी सरपंच मधुकर वेलादी, बोरी ग्राम पंचायतीचे उपसरपंच पराग ओलाल्लवार, सामाजिक कार्यकर्ते सुरेंद्र अलोणे, अखिल कोलपाकवार, जावेद अली, विजय कोकीरवार आदी प्रामुख्याने उपस्थित होते. (अधिक बातमी खाली वाचा)
यावेळी हर्षवर्धनबाबा आत्राम यांनी राजर्षी शाहू महाराज यांच्या प्रतिमेसमोर दीप प्रज्वलन व पुष्पमाला अर्पण करून अभिवादन केले. याप्रसंगी सुरेंद्र अलोणे, अखिल कोलपाकवार यांनी राजर्षी शाहू महाराज यांच्या ऐतिहासिक जीवनकार्यावर प्रकाश टाकला. प्रास्ताविक मुख्याध्यापक रवी येमसलवार यांनी तर संचालन सुरेखा मेश्राम यांनी केले.
यावेळी शाळेच्या आवारात विविध प्रजातींच्या वृक्षांचे रोपण हर्षवर्धनबाबा आत्राम यांच्या हस्ते करण्यात आले. यावेळी विद्यार्थी, विद्यार्थिनी, गावकरी मोठ्या संख्येने उपस्थित होते.
