गडचिरोली : महाआवास अभियान 2024-25 अंतर्गत प्रधानमंत्री आवास योजना – ग्रामीण टप्पा 2 मध्ये जिल्ह्यातील 36 हजार 70 लाभार्थ्यांना घरकुलाचे मंजुरी पत्र तर 15 हजारपेक्षा अधिक लाभार्थ्यांना प्रथम हप्त्याचे वितरण शनिवार, दि.22 फेब्रुवारीला केले जाणार आहे.
हा राज्यस्तरीय मुख्य सोहळा पुणे येथे केंद्रीय गृहमंत्री, महाराष्ट्राचे मुख्यमंत्री आणि ग्रामविकास व पंचायतराज मंत्री यांच्या उपस्थितीत होणार आहे. त्याचे थेट प्रक्षेपण जिल्ह्यातील सर्व ग्रामपंचायतींमध्ये आणि पंचायत समितींमध्ये दाखवले जाणार आहे. सोबतच गडचिरोली जिल्हास्तरीय कार्यक्रम जिल्हाधिकारी कार्यालयातील नियोजन भवनात दुपारी 3 वाजता पार पडणार आहे.
जिल्ह्यातील 36,070 लाभार्थ्यांना घरकुल मंजुरी देण्यात आली आहे. नियोजन भवनाप्रमाणेच ग्रामपंचायत स्तरावर लाभार्थी आणि ग्रामस्थांच्या उपस्थितीत मार्गदर्शन सत्र होणार आहे.
हा उपक्रम ग्रामीण भागातील नागरिकांना हक्काचे घर मिळवून देण्याच्या दिशेने मोठे पाऊल ठरणार आहे. जिल्ह्यातील सर्व लाभार्थी, ग्रामस्थ आणि लोकप्रतिनिधींना या महत्त्वपूर्ण कार्यक्रमास उपस्थित राहण्याचे आवाहन जिल्हा परिषदेचे मुख्य कार्यकारी अधिकारी सुहास गाडे यांनी केले आहे.
