कुरखेडा : आमदार म्हणून कृष्णा गजबे यांनी आरमोरी मतदार संघातील अनेक समस्या पोटतिडकीने शासनस्तरावर मांडल्या आहेत. त्यातील बऱ्याच समस्या त्यांनी सातत्याने पाठपुरावा करून सोडविल्या. पण विकासाचा अजून बराच पल्ला गाठायचा आहे. त्यासाठी पुन्हा गजबे यांनाच निवडून द्या, या मतदार संघाच्या सर्वांगिन विकासाची गॅरंटी माझी, असा विश्वास भाजपचे ज्येष्ठ नेते, केंद्रीय मंत्री नितीन गडकरी यांनी येथे दिला.
आरमोरी विधानसभा मतदारसंघातील भाजप-महायुतीचे उमेदवार कृष्णा गजबे यांच्या प्रचारासाठी कुरखेडा येथे आयोजित जाहीर सभेत ना.गडकरी बोलत होते. ना.गडकरी यांचे आगमन होताच सहकार महर्षी अरविंद सा.पोरेड्डीवार यांनी ना.गडकरी यांचे हेलिपॅडवर पुष्पगुच्छ देऊन स्वागत केले. सभास्थळी त्यांचे आगमन झाल्यानंतर हजारोच्या संख्येने उपस्थित नागरिकांनी जयघोष करत त्यांचे स्वागत केले.
यावेळी ना.गडकरी यांनी आपल्या भाषणात आरमोरीचे आमदार कृष्णा गजबे यांच्या विकास कामांवर प्रकाश टाकला. गजबे यांच्या गेल्या 10 वर्षांच्या कार्यकाळात मतदारसंघातील शेतकऱ्यांना त्यांच्या उत्पादनासाठी योग्य बाजारभाव मिळवून देणे, तरुणांना रोजगाराच्या संधी उपलब्ध करून देणे आणि संपूर्ण मतदार संघाच्या विकासासाठी ते कटीबद्ध राहिल्याचे सांगितले. गडचिरोली जिल्ह्यातील नागरिकांना गरिबी आणि बेरोजगारीतून बाहेर काढणे हेच माझे उद्दिष्ट आहे, असेही ते म्हणाले.
विकासाच्या दिशेने भरीव कामगिरी
गडकरी यांनी सांगितले की, आरमोरी मतदारसंघासाठी मोठ्या प्रमाणात निधी मंजूर केला गेला आहे. विशेषतः कुरखेडा परिसरात रस्त्यांचे काँक्रीटीकरण, पूल बांधणी आणि दळणवळणाच्या सुविधा वाढविण्यासाठी 164 कोटी रुपये मंजूर झाले आहेत. हे काम लवकरच पूर्ण होईल. त्यांनी रायपूर ते विशाखापट्टनम या 55 हजार कोटी रुपयांच्या ग्रीन फिल्ड एक्सप्रेस हायवेचे महत्त्व सांगितले. हा महामार्ग गडचिरोलीला थेट रायपूर आणि विशाखापट्टनमशी जोडेल.
राष्ट्रीय महामार्गासह दुग्धव्यवसायाला चालना
गडकरी यांनी त्यांच्या मंत्रीपदाच्या कार्यकाळात गडचिरोली जिल्ह्यातील राष्ट्रीय महामार्गांचे जाळे 57 किमीवरून 598 किमीपर्यंत वाढविले असल्याचे नमूद केले. यातून जिल्ह्यातील दळणवळण आणि व्यापारवाढीला चालना मिळणार आहे. दुग्धव्यवसायाचे महत्त्व विशद करुन आरमोरी मतदार संघासह संपूर्ण गडचिरोली जिल्ह्यात दुग्धव्यवसायाला मोठी संधी आहे. जिल्ह्यातील शेतकऱ्यांनी शेतीसोबत गायींची जोपासना करावी, दुग्धव्यवसाय वाढीसाठी आवश्यक ती मदत देण्याचे आश्वासन त्यांनी दिले.
यावेळी मंचावर सहकार विकास महामंडळाचे अध्यक्ष अरविंद सावकार पोरेड्डीवार, पद्मश्री डॉ.परशुराम खुणे, जिल्हा नागरी सहकारी बँकेचे अध्यक्ष प्रकाश सावकार पोरेड्डीवार, महायुतीचे उमेदवार आ.कृष्णा गजबे, भाजपचे विधानसभा निरीक्षक श्रीनिवास, लोकसभा समन्वयक किशन नागदेवे, शिंदेसेनेचे विधानसभा समन्वयक नारायण धकाते, राष्ट्रवादी (अजित पवार)चे विधानसभा समन्वयक किशोर तलमले, अयुब खान, मोतीलाल कुकरेजा, गणपत सोनकुसरे, रविन्द्र गोटेफोडे, बबलू हुसैनी, माधवदास निरंकारी, भाजप अनुसूचित जाती सेलचे जिल्हाध्यक्ष अॅड.उमेश वालदे, डॉ.टी.एन. बुद्धे, खेमनाथ पाटील डोंगरवार, वसंतराव मेश्राम, व्यंकटी नागीलवार, खिळसागर नाकाडे, वामनराव फाये, शिंदेसेनेचे अनिकेत आकरे, विलास गावंडे, सागर निरंकारी, शिवसेनेच्या (शिंदे) महिला जिल्हा प्रमुख अर्चना गोंधोळे, गिता कुमरे, नाजूक पुराम, माजी नगराध्यक्ष पवन नारनवरे, भारत बावनथळे, पंकज खरवडे, आणि इतर अनेक मान्यवर उपस्थित होते.
