वैरागड : जादूटोणा करत असल्याच्या संशयावरून एका दिव्यांग वृद्ध मजुरास त्याच्या बहिणीच्या घरात मध्यरात्री घुसून काही लोकांनी मारहाण केली. त्या सर्व आरोपीवर जादूटोणाविरोधी कायद्याअंतर्गत गुन्हा दाखल करून फौजदारी कारवाई करण्याची मागणी ढिवर-भोई जमात संघटनेने पोलीस अधीक्षक आणि आरमोरी पोलिसांच्या नावे दिलेल्या निवेदनातून केली आहे.
दिलेल्या निवेदनानुसार, वैरागड येथील चिरकुटा विठोबा मेहेरे हे कुटुंब एका विशिष्ट पंथाचे सेवक आहे. त्यांच्या घरातील सदस्यांना जादूटोणा केला, त्यांच्या सुनेला रात्रीच्या वेळी एक चालती कणकीची बाहुली जवळ येते आणि अदृश्य होताना दिसते. हा भूतबाधेचा प्रकार असून त्यामागे विठ्ठल शेंडे नावाची व्यक्ती आहे, असा शोध पुजारी हरिदास बालपांडे रा.रुई (ता.ब्रह्मपुरी) यांनी लावला. मेहरे कुटुंबियांवरील हा जादूटोणा परतवण्यासाठी हरिदास बालपांडे यांच्या हस्ते पूजा-पाठाच्या कार्यक्रमाचे आयोजन केले होते. दि.24 नोव्हेंबरच्या रात्री जेवणाचा कार्यक्रम आटोपल्यानंतर पूजापाठाच्या कार्यक्रमाला सुरुवात झाली. या दरम्यान चिरकुटा मेहेरे यांच्या सुनेच्या अंगात आले आणि मला विठ्ठल शेंडे नावाच्या व्यक्तीने जादूटोणा केला, असे तिने सांगितले, असे तक्रारकर्त्यांचे म्हणने आहे.
दरम्यान या पूजापाठाच्या कार्यक्रमात सहभागी दुसऱ्या गावावरून आलेले मेहंदी बाबाचे सेवक, मेहेरे कुटुंबातील सदस्य यांनी मध्यरात्रीच पंढरी दुमाने यांचे घर गाठले आणि त्यांच्या घरी झोपलेले विठ्ठल शेंडे या जादूखोराला घरात ठेवता म्हणून मारहाण केली. पंढरी तुकाराम शेंडे (60 वर्ष) या अपंग वृद्धाला खाटेवरून ओढून लाथाबुक्क्यांनी मारहाण करत पुजेच्या ठिकाणी मेहरे यांच्या घरी नेले. नंतर रात्रीच वैरागड येथील पोलीस पाटील यांना बोलवून याने माझ्या सुनेला जादूटोणा केला. यासाठी याला कबुलीसाठी आणले असे सांगून पुन्हा त्या ठिकाणी पुजारी असलेल्या हरिदास बालपांडे यांनी व इतर सेवकांनी मारण्यास सुरुवात केली. पण पोलीस पाटलांनी मध्यस्थी करून समज देऊन पंढरी शेंडे यांची सुटका केली.
दि.25 नोव्हेंबरला सकाळी पंढरी जणू दुमाने यांच्यासह घरातील इतर सदस्यांनी झालेल्या प्रकाराची लेखी तक्रार आरमोरी पोलिसात दिली. त्यात 7 व्यक्तींचे नाव दिले होते, पण आरमोरी पोलिसांनी तिघांविरूद्ध कोणतीही कारवाई केली नाही. वास्तविक या गुन्ह्यात सहभागी सर्वांवर जादुटोणाविरोधी कायद्याअंतर्गत गुन्हा दाखल करून कारवाई करावी, अशी मागणी ढिवर-भोई जमात संघटनेचे पदाधिकारी प्रा.भाग्यवान मेश्राम, सुरेश खेडकर, रामदास डोंगरवार, राजेंद्र मेश्राम, बाबुराव शेंडे, शालू दुमाने, वैशाली डोंगरवार, शालिनी दुमाने यांनी एका लेखी निवेदनातून केली आहे.
