मार्कंडा मंदिर परिसरातील विकास कामे पावसाळ्यापूर्वी पूर्ण करण्याचे निर्देश

मुख्य सचिव सुजाता सौनिक यांची भेट

गडचिरोली : जिल्ह्यातील ऐतिहासिक मार्कंडा शिव मंदिर परिसरातील विकास कामे पावसाळ्यापूर्वी पूर्ण करण्याचे निर्देश राज्याच्या मुख्य सचिव सुजाता सौनिक यांनी दिले. त्यांनी गुरूवारी मार्कंडा मंदिराला भेट देऊन विकासकामांचा आढावा घेतला. यावेळी जिल्हाधिकारी अविश्यांत पंडा, नक्षलविरोधी अभियानाचे विशेष पोलीस महानिरीक्षक संदीप पाटील, पोलीस अधीक्षक निलोत्पल, सार्वजनिक बांधकाम विभागाच्या अधीक्षक अभियंता नीता ठाकरे, सहायक जिल्हाधिकारी अमित रंजन प्रामुख्याने उपस्थित होते.

मुख्य सचिवांनी मंदिर परिसरातील घाट, वाहनतळ, बगीचा यासारख्या कामांची प्रगती तपासून तीन-चार महिन्यांत ही कामे पूर्ण करण्याचे निर्देश दिले. त्यांनी मार्कंडा परिसराचे ऐतिहासिक महत्त्व अधोरेखित करणारे भव्य स्वरूप देण्याच्या सूचना दिल्या. त्यात जुन्या ऐतिहासिक नक्षीदार प्रवेशद्वाराची उभारणी, शिर्डीच्या धर्तीवर प्रसादालय, बैठक व्यवस्था, पुस्तकालय, प्राचीन माहिती केंद्राची उभारणी आणि शेगाव मंदिराप्रमाणे स्वच्छतेचे नियोजन यांचा समावेश करण्यास सांगितले.

मंदिर परिसरात भाविकांसाठी सुयोग्य रस्ता आणि वाहनतळ उभारणे, भक्तनिवास दुरुस्ती व त्यासाठी ऑनलाइन बुकिंगची पारदर्शक व्यवस्था निर्माण करण्याचे निर्देशही देण्यात आले. मंदिरालगतचे ग्रामपंचायत कार्यालय स्थलांतरित करण्यासाठी ठराव मंजूर करून स्थानिक ग्रामस्थांची संमती तातडीने मिळवण्यावर भर देण्याची सूचना त्यांनी केली. त्यामुळे दुसऱ्या टप्प्यातील कामांसाठी व नवीन ग्रामपंचायत इमारत बांधकामाला मंजुरी देणे सोयीचे होईल, असेही त्यांनी सांगितले.

पुरातत्त्व विभागाद्वारे मुख्य मंदिराच्या सुरू असलेल्या बांधकामाला गती देण्याचे प्रयत्न करण्यात येईल, असेही त्यांनी यावेळी स्पष्ट केले. सर्व संबंधित विभागांनी वेळेवर निर्णय घेऊन कामे गतिमान करावीत, असे निर्देश मुख्य सचिवांनी दिले. यावेळी पुरातत्त्व विभाग, सार्वजनिक बांधकाम व महसूल विभागाचे अधिकारी, तसेच मंदिराचे विश्वस्त, पुजारी, सरपंच व ग्रामस्थ उपस्थित होते.