गडचिरोली : संत महात्म्यांनी सांगितल्याप्रमाणे दिनदुबळ्यांची सेवा हिच खरी ईश्वरसेवा आहे, ही शिकवण प्रत्यक्षात उतरवत नवीन वर्षाचे स्वागत दिव्यांग मुलांसोबत साजरे करण्याचा स्तुत्य उपक्रम गडचिरोलीत राबविण्यात आला. शिवकल्याण युथ मल्टीपर्पज डेव्हलपमेंट असोसिएशन आणि राष्ट्रीय ओबीसी युवा महासंघाच्या वतीने या उपक्रमाचे आयोजन केले होते.
नवीन वर्षाचे औचित्य साधून निवासी अपंग विद्यालयात दिव्यांग मुलांसोबत नववर्षाचा स्वागत सोहळा झाला. यावेळी संस्थेच्या वतीने दिव्यांग मुलांना खाउचे वाटप करण्यात आले. यावेळी त्यांच्याशी हितगुज करून त्यांचे सुख-दुःख समजून घेण्याचा प्रयत्न उपस्थितांनी केला.
यावेळी शिवकल्याण संस्थेचे अध्यक्ष अनुप कोहळे, राष्ट्रीय ओबीसी युवा महासंघ गडचिरोलीचे जिल्हाध्यक्ष राहुल भांडेकर, सेवानिवृत्त नायब तहसीलदार सुनील चडगुलवार, शिवकल्याण संस्थेचे सहसचिव संतोषी सुत्रपवार, महेंद्र लटारे, विकास मादेशवार, कृतिका काठवले, अजय सोमनकर, गणेश सूत्रपवार आणि इतर युवक व सामाजिक कार्यकर्ते उपस्थित होते.
