गडचिरोली : महाराष्ट्र राज्य विद्याशाखा विकास प्रबोधिनी व गोंडवाना विद्यापीठ यांच्या संयुक्त विद्यमाने आयोजित आदिवासी गौरव यात्रेतील अध्यापकांनी वरोरा येथील आनंदवन आणि सोमनाथ प्रकल्पाला भेट दिली. यावेळी त्यांनी संधी सदन, अटलवन, काष्ठ शिल्प, हातमाग, प्रिंटिंग प्रेस, स्वरानंदनवन, सीता रतन लेप्रसी हॉस्पिटल अशा विविध विभागांना भेट देऊन माहिती घेतली.
यावेळी डॉ.विकास आमटे यांनी चर्चेदरम्यान बाबा आमटे यांच्या कार्याला उजाळा दिला. आनंदवनमधील प्रकल्पांची माहिती आनंद निकेतन महाविद्यालयाचे प्राचार्य डॉ.मृणाल काळे यांनी दिली. सरस्वती गणवीर यांनी क्षेत्रभेटीदरम्यान सोमनाथ येथील प्रकल्पाची माहिती दिली. अरुण कदम यांनी प्रकल्पाविषयी संवाद साधला. आभार प्रा.जे.बी. पाटील यांनी मानले.
हा उपक्रम 15 ते 21 डिसेंबर या कालावधीत आयोजित करण्यात आला असून राज्यातील विविध महाविद्यालयांमधून 25 प्राध्यापक यात सहभागी झाले आहेत. या अभ्यासदौऱ्यामध्ये आनंदवन, सोमनाथ, हेमलकसा येथील लोकबिरादरी, सर्च, मेंढा-लेखा येथील उपक्रमांचा अभ्यास करण्यात येणार आहे.
