गडचिरोली : महाराष्ट्र शासनाचे तब्बल 36 लाखांचे इनाम असलेल्या पाच जहाल माओवाद्यांना अटक करून त्यांचा विध्वंसक कारवाया करण्याचा डाव पोलिसांनी उधळून लावला. यात तीन वरिष्ठ कॅडरच्या महिला माओवाद्यांचा समावेश आहे. या कारवाईदरम्यान त्यांच्याकडून 7 वेगवेगळ्या बंदुका जप्त करण्यात आल्या.
जिल्हा पोलीस दल आणि सीआरपीएफने केलेल्या संयुक्त कारवाईत त्यांना मंगळवारी ताब्यात घेण्यात आले. यात छत्तीसगडमधील रहिवासी असलेल्या तीन महिला माओवाद्यांना अटक केली, तर इतर दोन जणांच्या वयाबाबत ठोस पुरावा नसल्याने त्यांना पुढील कायदेशिर कारवाईसाठी ताब्यात घेतले आहे. गडचिरोली पोलीस दलाच्या प्रभावी कारवायांमुळे जानेवारी 2022 ते आतापर्यंत एकुण 103 माओवाद्यांना अटक करण्यात यश आले आहे.
भामरागड उपविभागांतर्गत येणाऱ्या लाहेरी उपपोलीस स्टेशनच्या हद्दीतील बिनागुंडा येथे 50 ते 60 च्या संख्येने माओवादी पोलीस जवानांवर हल्ला करुन घातपात घडविण्याच्या उद्देशाने एकत्र जमले असल्याची गोपनिय माहिती पोलिसांना मिळाली होती. त्यानुसार पोलीस अधीक्षक नीलोत्पल, अपर पोलीस अधीक्षक (अभियान) यतिश देशमुख, अपर पोलीस अधीक्षक (प्रशासन) एम.रमेश, अपर पोलीस अधीक्षक अहेरी सत्यसाई कार्तिक यांच्या मार्गदर्शनाखाली पोलीस उपअधीक्षक (अभियान) विशाल नागरगोजे यांच्या नेतृत्वात सी-60 (विशेष कृती दल) ची 8 पथके आणि ए कंपनी 37 बटालियन सीआरपीएफचे पथक रविवारी (दि.18) जंगल परिसरात रवाना करण्यात आले होते. दरम्यान दि.19 ला सकाळी सी-60 पथके माओवादविरोधी अभियान राबवित असताना बिनागुंडा गावाला शिताफीने घेराबंदी करुन गावामध्ये शोध घेण्यास सुरुवात केली असता, काही हिरवे-काळे गणवेश परिधान केलेले व काही साध्या वेशातील हत्यारासह असलेल्या संशयित व्यक्ती पोलीस पथकावर घातपात करण्याची योजना आखत असल्याचे दिसून आले.
गावामध्ये सामान्य नागरिक देखील असल्याने पोलीस पथकाने गोळीबार न करता अत्यंत शिताफीने पाच माओवाद्यांना त्यांच्याकडील हत्यारासह ताब्यात घेतले. यावेळी इतर माओवादी गावाचा व जंगल परिसराचा फायदा घेत त्या ठिकाणावरुन पळून जाण्यास यशस्वी झाले. त्यानंतर ताब्यात घेण्यात आलेल्या माओवाद्यांची अधिक सखोल चौकशी करण्यासाठी पोलीस मुख्यालय गडचिरोली येथे आणले.
छत्तीसगडसह महाराष्ट्रातही सक्रिय
अटक केलेल्या जहाल महिला माओवाद्यांमध्ये उंगी मंगरु होयाम ऊर्फ सुमली (डीव्हीसीएम, प्लाटून क्रमांक 32), वय 28 वर्षे, रा.पल्ली, जि.बिजापूर (छ.ग.), पल्लवी केसा मिडीयम ऊर्फ बंडी (पीपीसीएम, प्लाटुन क्रमांक 32), वय 19 वर्षे, रा.कोंचल, जि.बिजापूर (छ.ग.) आणि देवे कोसा पोडीयाम ऊर्फ सबिता (सदस्य, प्लाटुन क्रमांक 32), वय 19 वर्षे रा.मारोट बाकापंचायत जि.बिजापूर (छ.ग.). इतर दोन माओवाद्यांची चौकशी सुरू आहे.
त्यांच्याकडून एक एसएलआर रायफल, एक .303 रायफल, तीन सिंगल शॉट रायफल, दोन भरमार बंदुका, तीन वॉकीटॉकी व ईतर साहित्य जप्त करण्यात आले. उंगी ऊर्फ सुमली हिच्यावर 16 लाख रुपयांचे, पल्लवी ऊर्फ बंडी हिच्यावर 8 लाख रुपयांचे, देवे ऊर्फ सबिता हिच्यावर 4 लाख रुपयांचे बक्षीस होते. याशिवाय इतर दोन माओवादी सदस्यांवर 8 लाख रुपयांचे बक्षीस होते.
ही कारवाई विशेष पोलीस महानिरीक्षक (नक्षलविरोधी अभियान) संदीप पाटील, पोलीस उपमहानिरीक्षक अंकित गोयल, उपमहानिरीक्षक (अभियान) सीआरपीएफ अजयकुमार शर्मा, पोलीस अधीक्षक नीलोत्पल, कमांडंट 37 बटा. सीआरपीएफ दाओ किंडो, अपर पोलीस अधीक्षक (अभियान) यतिश देशमुख, अपर पोलीस अधीक्षक (प्रशासन) एम.रमेश, अपर पोलीस अधीक्षक (अहेरी) सत्यसाई कार्तिक, पोलीस उपअधीक्षक (अभियान) विशाल नागरगोजे व उपविभागीय पोलीस अधिकारी (भामरागड) अमर मोहिते यांच्या मार्गदर्शनाखाली विशेष अभियान पथकाचे अधिकारी व जवान यांनी पार पाडली.
