गडचिरोली : लॉयड्स मेटल्स अँड एनर्जी लिमिटेड (एलएमईएल)ने कोनसरी गावातील 19 महिलांना हलके मोटार वाहन चालविण्याच्या प्रशिक्षणासाठी मध्यप्रदेशातील अशोक लेलँडच्या प्रशिक्षण केंद्रात पाठविले होते. ते प्रशिक्षण यशस्वीरित्या पूर्ण करून या महिला परतल्यानंतर त्यांना लॅायड्सच्या कोनसरी प्रकल्पात वाहन चालक म्हणून नियुक्ती देऊन आपल्या कुशल मनुष्यबळात समाविष्ठ केले. यामुळे कौशल्य विकासातून महिला सक्षमीकरण आणि लैंगिक समानतेचा एक नवीन अध्याय जोडला गेला आहे.
यावर्षी जूनमध्ये एलएमईएलने कोनसरी गावातील 19 महिलांची हलके मोटार वाहन चालविण्याच्या प्रशिक्षणासाठी निवड केली होती. 45 दिवसांच्या या निवासी प्रशिक्षणादरम्यान, या महिलांनी हलके मोटार वाहन चालविण्याचे कौशल्य आत्मसात केले. यामुळे त्यांचा आत्मविश्वासच नाही तर प्रतिष्ठेची भावनाही अधिक वृद्धिंगत झाली. या महिलांचे एलएमईएल परिवारात वरिष्ठ अधिकाऱ्यांनी समारंभपूर्वक स्वागत केले. त्यांनी नवीन कौशल्य आत्मसात केल्यामुळे त्यांच्या कुटुंबातील सदस्यांनाही त्यांचा सार्थ अभिमान वाटला.
कोनसरी येथील लॉयड्स कौशल्य विकास आणि प्रशिक्षण केंद्रामध्ये झालेल्या या समारंभात या महिलांना संबोधित करताना, एलएमईएलचे वरिष्ठ अधिकारी म्हणाले की, लॉयड्स मेटल्सने समुदाय सक्षमीकरणाला यशाचा आधारस्तंभ मानले आहे. एलएमईएलचे व्यवस्थापकीय संचालक बी.प्रभाकरन यांच्या उदात्त दृष्टिकोनात कौशल्य विकासाद्वारे स्थानिक समुदायातील महिलांचे सक्षमीकरण, मनुष्यबळात लैंगिक समानता सुनिश्चित करणे आणि महिलांना उत्तरोत्तर प्रगतीच्या नव्या संधी उपलब्ध करून देणे यांचा समावेश आहे. या महिला एलएमईएल परिवारात सामील झाल्यामुळे, त्यांच्या जीवनात प्रगतीचा एक नवीन अध्याय सुरू झाला आहे. शिस्त, सुरक्षितता आणि जबाबदारीद्वारे उच्च भूमिकांसाठी पात्रता मिळवून प्रगतीची शिडी चढण्याचा सल्ला एलएमईएलच्या वरिष्ठ अधिकाऱ्यांनी याप्रसंगी नवनियुक्तांना दिला.
याप्रसंगी एलएमईएल परिवारात नव्याने सामील झालेल्या या महिलांना नियुक्तीपत्रे, प्रशिक्षण यशस्वीरित्या पूर्ण केल्याचे प्रमाणपत्र, वाहनचालक परवाना, आणि पुष्पगुच्छ प्रदान करण्यात आले.
