गडचिरोली : अखिल भारतीय विद्यार्थी परिषदेच्या विदर्भ प्रांताचे 54 वे प्रांत अधिवेशन दिनांक 9, 10 आणि 11 जानेवारी 2026 रोजी गडचिरोलीतील सुमानंद सभागृहात पार पडणार आहे. या अधिवेशनाचे उद्घाटन राज्याचे आदिवासी विकासमंत्री डॉ.अशोक उईके यांच्या हस्ते होणार आहे. या अधिवेशनात विदर्भाच्या 120 तालुक्यातील आणि 119 मोठ्या गावांमधील 350 महाविद्यालयांतून 500 विद्यार्थी प्रतिनिधी सहभागी होणार आहेत.
या अधिवेशनात विविध शैक्षणिक व सामाजिक समस्यांवर विद्यार्थ्यांचे मत घेऊन त्या समस्यांचे निराकरण करण्यासाठी विविध प्रस्तावसुद्धा पारित केले जातील. गडचिरोलीत पहिल्यांदाच विदर्भ प्रांताचे अधिवेशन होत आहे. त्यामुळे हे अधिवेशन ऐतिहासिक ठरणार आहे. तसेच हे वर्ष भगवान बिरसा मुंडा यांच्या जन्मजयंतीचे 150 वे वर्ष असल्याने त्यांच्या जन्मस्थळ म्हणजे झारखंडमधील उलिहातू येथून आणलेले मातीचे कलश घेऊन अभाविप विदर्भात तीन यात्रा काढणार आहे. त्यात बुलढाणा जिल्ह्यातील सिंदखेड राजा, अमरावती जिल्ह्यातील धारणी आणि गोंदिया जिल्ह्यातील कचारगड येथून जनजाती गौरव यात्रा काढून त्यांचे विचार समाजापर्यंत पोहोचविले जाणार आहे. ही यात्रा 8 तारखेला सायंकाळपर्यंत गडचिरोली येथे भगवान बिरसा मुंडा नगर येथे पोहोचेल.
अधिवेशनाच्या भूमीला भगवान बिरसा मुंडा नगर असे नाव देण्यात येणार आहे. अधिवेशनाच्या सुरूवातीला भव्य शोभायात्रा काढण्यात येणार आहे, ज्यामध्ये विदर्भातील विविध जिल्ह्यांच्या माध्यमातून वैदर्भीय संस्कृतीचे दर्शन होईल. या शोभायात्रेचा शेवट जाहीर सभेने होणार आहे. या सभेच्या मंचावरून विदर्भ प्रांतातील छात्रनेते विविध विषयांवर मार्गदर्शन करतील, अशी माहिती विदर्भ प्रांत मंत्री पायल किनाके यांनी पत्रकार परिषदेत दिली.
स्वागत समिती गठीत
या अधिवेशनाच्या स्वागत समितीचे अध्यक्ष आमदार डॉ.मिलिंद नरोटे असतील. उपाध्यक्ष प्रंचीत पोरेड्डीवार, ॲड.प्रणोती निंबोरकर, तर स्वागत समिती सचिव म्हणून गोविंद सारडा, सहसचिव प्रमोद पिपरे व अनिल पोहनकर, कोष प्रमुख प्रशांत भृगवार असतील. त्याचप्रकारे या स्वागत समितीचे संरक्षक म्हणून राष्ट्रीय स्वयंसेवक संघाचे गडचिरोली जिल्हा संघचालक घिसुलाल काबरा, माजी खासदार डॉ.अशोक नेते, ॲड.प्रमोद बोरावार, आमदार धर्मरावबाबा आत्राम, कीर्तिकुमार भांगडिया, डॉ.देवराव होळी, कृष्णा गजबे, डॉ.नामदेव उसेंडी आदींचा समावेश आहे.
युवा म्हणजे भविष्यातील नेतृत्व आणि ते नेतृत्व या अधिवेशनादरम्यान विदर्भाच्या कानाकोपऱ्यातून गडचिरोलीमध्ये येणार आहे. गडचिरोलीकरांनी या संधीचे सोने करून विद्यार्थी परिषदेच्या अधिवेशनाला येणाऱ्या सर्व विद्यार्थी प्रतिनिधींचे स्वागत करावेत आणि अधिवेशनाला भरभरून सहकार्य द्यावे, असे आवाहन स्वागत समितीचे सचिव गोविंद सारडा यांनी पत्रकार परिषदेच्या माध्यमातून गडचिरोलीतील जनतेला केले.
पत्रपरिषदेला अ.भा.वि.प. गडचिरोली नगर अध्यक्ष प्रा.सुनिता साळवे, नगर मंत्री संकेत मस्के, गडचिरोली जिल्हा मीडिया संयोजक करण चौधरी यांची उपस्थिती होती.
